International Yoga Day 2026 : सामूहिक योगासनांनी दिला निरोगी जीवनाचा मंत्र; नागरदेवळेत योग दिन उत्साहात

International Yoga Day 2026 : अहिल्यानगर : नगर तालुक्यातील नागरदेवळे येथील प्राथमिक आरोग्य उपकेंद्र व ग्रामपंचायत कार्यालय यांच्या संयुक्त विद्यमाने शनिवारी (२१ जून) जागतिक योग दिन उत्साहपूर्ण वातावरणात साजरा करण्यात आला. नागरदेवळे ग्रामपंचायत कार्यालयात आयोजित कार्यक्रमात अधिकारी, कर्मचारी, आरोग्य सेवक तसेच नागरिकांनी सहभाग घेत विविध योगासने व प्राणायामाचा सराव केला.

योग दिनाच्या कार्यक्रमात सामुदायिक आरोग्य अधिकारी डॉ. विशाल घंगाळे, ग्रामपंचायत अधिकारी नेताजी भाबड, आरोग्य सेवक सचिन चितळे, गटप्रवर्तक कांचन शेंडे, आशासेविका कामिनी खेतमाळीस, अश्विनी खेतमाळीस, रजिया शेख, आशा धाडगे, वृषाली धाडगे, सुनीता कड आदी उपस्थित होते.

यावेळी उपस्थितांनी विविध योगासने आणि प्राणायाम करून निरोगी जीवनशैलीचा संदेश दिला. योगामुळे शारीरिक, मानसिक, भावनिक आणि आध्यात्मिक संतुलन राखण्यास मदत होते, असे मार्गदर्शनही करण्यात आले.

प्राचीन भारतीय संस्कृतीची अमूल्य देणगी असलेल्या योगाचे महत्त्व आज संपूर्ण जगाने स्वीकारले आहे. धकाधकीच्या जीवनात आरोग्य सुदृढ ठेवण्यासाठी योग हा प्रभावी मार्ग असून नियमित योगाभ्यासातून शरीर व मन दोन्ही निरोगी राहते, असे मत उपस्थितांनी व्यक्त केले.

जागतिक स्तरावर योगाचा प्रचार व प्रसार करण्यासाठी दरवर्षी २१ जून रोजी आंतरराष्ट्रीय योग दिन साजरा केला जातो. यानिमित्त नागरदेवळे येथे आयोजित कार्यक्रमातून योगाबाबत जनजागृती करत निरोगी जीवनाचा संदेश देण्यात आला.