Illegal Mawa Production : अहिल्यानगर : पारनेर तालुक्यात सुरू असलेल्या बेकायदेशीर मावा निर्मितीवर स्थानिक गुन्हे शाखेने धडक कारवाई करत छापा टाकला. या कारवाईत अमन सुलतान तांबोळी (वय १९, रा. भाळवणी, ता. पारनेर) याला ताब्यात घेण्यात आले असून, त्याच्याकडून एकूण १ लाख ५ हजार रुपये किमतीचा मुद्देमाल जप्त करण्यात आला आहे.
पोलीस अधीक्षकांच्या आदेशानुसार स्थानिक गुन्हे शाखेचे पथक जिल्ह्यातील अवैध धंद्यांची माहिती घेत असताना हॉटेल रुचिराच्या पाठीमागील खोलीत मावा तयार केला जात असल्याची गोपनीय माहिती मिळाली. त्यानंतर पथकाने पंचांसमक्ष संबंधित ठिकाणी छापा टाकला. त्यावेळी अमन तांबोळी हा तयार केलेला मावा प्लास्टिकच्या पुड्यांमध्ये भरताना आढळून आला. पोलिसांनी त्याच्या ताब्यातून मावा तयार करण्यासाठी वापरण्यात येणारी इलेक्ट्रिक मशीन, २ किलो तयार मावा आणि १ किलो सुपारीचा चुरा असा एकूण एक लाख पाच हजार रुपये किमतीचा मुद्देमाल जप्त केला.
या प्रकरणी पारनेर पोलीस ठाण्यात गुन्हा दाखल करण्यात आला आहे. पुढील तपास पारनेर पोलीस ठाणे करीत आहे. ही कारवाई पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेचे पोलीस अधिकारी व अंमलदार यांनी केली.
