Hospitalization : हॉस्पिटल्स बाराही महिने हाऊसफुल्ल; जीवनशैलीवर आत्मचिंतन हवे!

Hospitalization : अहिल्यानगर : आधुनिक जीवनशैलीमुळे आज हॉस्पिटल्स बाराही महिने हाऊसफुल्ल दिसतात. यालाच प्रगती म्हणायचे का, असा आत्मचिंतन करायला लावणारा परखड सवाल वेदमूर्ती चकोर गुरू मुळे यांनी उपस्थित केला. जीवनात सुख-शांती-समाधान मिळवण्यासाठी केवळ भौतिक सुविधांपेक्षा शास्त्रोक्त कर्म, धर्मपरंपरा आणि दैनंदिन सत्कर्म यांना महत्त्व दिले पाहिजे, असे प्रतिपादनही त्यांनी केले.

येथील सनातन धर्मसभेच्या वतीने आयोजित शारदीय व्याख्यानमालेतील पुष्प ‘कर्मकांड आणि ग्रहशांती’ या विषयावर गुंफताना ते बोलत होते. देवी शारदेच्या प्रतिमेचे पूजन व आरती करून व्याख्यानाचा प्रारंभ झाला. वेदमूर्ती उमेश वाळुंजकर आणि वेदमूर्ती बंडोपंत मुळे यांनी पौरोहित्य केले.

वेदमूर्ती मुळे म्हणाले, आजच्या काळात सर्व उत्तम सुविधा सहज उपलब्ध असूनही माणूस सुख, शांती आणि समाधानाच्या शोधात आहे. विधिवत कर्मातून मनःशांती मिळते, तर प्राणायामामुळे शरीर निरोगी ठेवण्यास मदत होते. कुलदैवत आणि कुलस्वामिनीचे संकल्पपूर्वक पूजन केल्याने श्रद्धा दृढ होते आणि संकटांचा सामना करण्याचे बळ मिळते. इस्टेटीसाठी रक्ताची नाती तोडणारे आणि इतरांना त्रास देण्यात आनंद मानणारे पाहून दुःख होते. मात्र, हिंदू संस्कृती शत्रूच्याही बुद्धिविनाशाचा नव्हे, तर व्यापक कल्याणाचा विचार करते, असे त्यांनी स्पष्ट केले.

आपल्या घराण्यातील कुलधर्म, परंपरा, रूढी आणि रीतिरिवाज श्रद्धेने जतन करत दैनंदिन सत्कर्म केले, तर जीवन अधिक सुकर होते. समाजकारण, राजकारण, तीर्थयात्रा आणि व्यवसाय अशा विविध क्षेत्रांत कार्यरत असताना अनेकजण घरातील देवतांकडे दुर्लक्ष करतात. प्रत्येकाने दररोज देवघरातील देवांना नैवेद्य दाखवूनच भोजन करण्याची सवय लावून घ्यावी. दैनंदिन कर्म करताना कोणताही दोष लागणार नाही, याची दक्षता घ्यावी आणि आपण भगवंताच्या सृष्टीत राहतो, याचे सतत स्मरण ठेवावे, असे आवाहन त्यांनी केले.

यज्ञयागादी धार्मिक सोहळ्यांत सहभागी होऊन जीवनाचा आनंद घ्यावा, असे सांगतानाच त्यांनी यज्ञमंडप, शास्त्रोक्त यज्ञकुंड, स्थापित देवता, संकल्प, आवाहन, आवर्तन आणि पूर्णाहुती यांमधील विविध बारकावे सोप्या व नेमक्या शब्दांत उलगडून सांगितले. त्यांच्या विवेचनाला उपस्थित भाविकांनी उत्स्फूर्त प्रतिसाद दिला.

धर्मसभेचे मंत्री दिनकर देशमुख आणि खजिनदार उमेश नगरकर यांनी स्वागत केले. उपाध्यक्ष हभप निळकंठ महाराज देशमुख यांनी वक्त्यांचा परिचय करून दिला. यावेळी विश्वस्त समीर उपाध्ये, उदय वैकर, अॅड. अच्युतराव पिंगळे, अनंतराव देशपांडे, विश्व हिंदू परिषदेचे नगर जिल्हा धर्माचार्य संपर्क प्रमुख तथा प्रवचनकार मिलिंद महाराज चवंडके, संतोष बारसे, मालती मुळे, कमला काळे, सुनंदा जगनाडे, जया घुटाळ, मनीषा दळवी, माया देशमुख, सुरेखा देशपांडे, प्रतिभा मुळे यांच्यासह शहरातील विविध भागांतील प्रतिष्ठित भाविक उपस्थित होते.