Navratri Festival : मातृशक्तीचा सन्मान हाच नवरात्रोत्सवाचा खरा धर्म

Navratri Festival : अहिल्यानगर : मातृशक्तीचा सन्मान, स्त्रीशक्तीचा गौरव आणि आदिशक्तीची आराधना हाच नवरात्रोत्सवाचा खरा आत्मा आहे. आदिशक्तीचा जागर म्हणजे स्त्रीतत्त्वाचे जागरण असून, नवरात्रातून स्त्रीशक्तीच्या सामर्थ्याचा आणि सन्मानाचा दिव्य संदेश समाजापर्यंत पोहोचतो, असे प्रतिपादन हभप मिलिंद महाराज चवंडके यांनी केले.

नगरमधील महाजन गल्ली येथील सनातन धर्मसभेच्या शारदीय व्याख्यानमालेचा संकल्पपूर्वक विधिवत प्रारंभ हभप मिलिंद महाराज चवंडके आणि सोनाली चवंडके यांच्या हस्ते करण्यात आला. वेदमूर्ती उमेश वाळुंजकर यांनी पौरोहित्य केले. देवी शारदेच्या प्रतिमेचे पूजन व आरती करून प्रवचन सोहळ्याचा प्रारंभ झाला. वेदमूर्ती चकोर गुरू मुळे यांच्या वेदमंत्र पठणाने वातावरण भक्तिमय झाले.

नवरात्रोत्सवात कुलस्वामिनीची उपासना, आराधना आणि उपवास आपल्या कुटुंबातील परंपरा व रूढीनुसार श्रद्धापूर्वक करावेत, असे सांगून मिलिंद महाराज म्हणाले की, देवीच्या उपासनेत श्रद्धा, शास्त्राधार आणि विधिपूर्वक आचरण यांना महत्त्व आहे. नवरात्रीत देवीला अर्पण करावयाच्या फुलांच्या माळा, नैवेद्य आणि उपासनेच्या पद्धती याविषयी धार्मिक ग्रंथांचा अभ्यास करावा. केवळ बाह्य स्वरूपापेक्षा भक्तीभाव आणि परंपरेचे योग्य आचरण महत्त्वाचे आहे.

कुटुंबातील सुख, शांती व समृद्धीसाठी कुमारिका पूजनाचे महत्त्व विशद करताना त्यांनी स्कंदपुराणातील संदर्भांचा उल्लेख केला. देवी उपासनेसाठी दुर्गाकवच, महिषासुरमर्दिनी स्तोत्र, कुंजिका स्तोत्र, श्रीसूक्त, सप्तशृंगी स्तोत्र, अर्गला स्तोत्र आणि भवानी सहस्रनामावली यांसारख्या स्तोत्रांचे पठण व देवीचे ध्यान-प्रार्थना करण्याचे आवाहन त्यांनी केले. कुलदेवतेवरील श्रद्धा दृढ करून कुटुंबाच्या कल्याणासाठी संकल्पपूर्वक उपासना करावी, असेही त्यांनी सांगितले.

नाथभक्तांकडून नवरात्रीत नाथपंथीय अनुष्ठान केले जाते, तसेच श्रीरामरक्षेचेही अनुष्ठान केले जाते, असे नमूद करून ते म्हणाले की, आदिमाता आदिशक्तीपासून प्रकट झालेले स्त्रीतत्त्व शिवशक्तीच्या स्वरूपात विश्वकल्याणाची प्रेरणा देते. स्त्रियांनी आपण आदिशक्तीचे अंश आहोत, हा अभिमान बाळगावा आणि नवरात्रोत्सवातून मिळणारा आत्मसन्मानाचा संदेश आचरणात आणावा.

प्रारंभी धर्मसभेचे मंत्री दिनकर देशमुख व खजिनदार उमेश नगरकर यांनी उपस्थितांचे स्वागत केले. उपाध्यक्ष हभप निळकंठ महाराज देशमुख यांनी मिलिंद महाराज चवंडके यांचा परिचय करून दिला. यावेळी विश्वस्त समीर उपाध्ये, उदय वैकर, अॅड. अच्युतराव पिंगळे, अनंतराव देशपांडे, विश्व हिंदू परिषदेचे विभागमंत्री सुनीलराव खिस्ती, जिल्हा सहमंत्री शरदराव नगरकर, राष्ट्रीय स्वयंसेवक संघाचे हिरालाल पटेल, प्रवीण सोनी, सोन्याबापू मुदळ, मातृशक्तीच्या जिल्हा संयोजिका हिराताई शहापुरे, राणी भागानगरे, सुनंदा पानसरे, साधिका देशमुख यांच्यासह शहरातील विविध भागांतील प्रतिष्ठित भाविक उपस्थित होते. विश्वस्त रमेश देशपांडे यांनी आभार मानले.