Radhakrishna Maharaj : शानदार घरं वाढली… पण स्वयंपाकघरातील संस्कार हरवले : राधाकृष्ण महाराज

Radhakrishna Maharaj : अहिल्यानगर : अलिकडे उभारल्या जाणाऱ्या शानदार बंगल्यांत भव्यता वाढत असली, तरी स्वयंपाकघरातील पवित्रता कमी होत चालली आहे, असे स्पष्ट मत प.पू. श्रीराधाकृष्ण महाराजांनी व्यक्त केले. स्वयंपाकघर हे ईश्वराचे प्राकट्य असून सात्त्विक अन्न व शुद्धता हीच घरातील समाधानाची खरी गुरुकिल्ली असल्याचे त्यांनी सांगितले.

नगर येथील रामनिवास सतीशचंद्र इंदाणी व इंदाणी परिवारातर्फे नवीन टिळक रोडवरील नंदनवन लॉन्स येथे आयोजित श्रीमद् भागवत कथा ज्ञानयज्ञ सोहळ्याच्या द्वितीय पुष्पगुंफण प्रसंगी ते बोलत होते.

राधाकृष्ण महाराज म्हणाले, “स्वयंपाकघर भव्य नव्हे, तर सदैव पवित्र असले पाहिजे. “रस के रूप में ईश्वर प्रगट होते है, उसे रसोई कहते हैं. रसोई घर ईश्वर का प्राकट्य है,” असे सांगत त्यांनी स्वयंपाकघराचे आध्यात्मिक महत्त्व विशद केले. स्नान केल्याशिवाय स्वयंपाकघरात पाऊल ठेवू नये. चप्पल घालून तर अजिबात स्वयंपाकघरात जाऊ नये. घरात प्रवेश केल्यावर “मंदिरात आलो” असे वाटले, तरच घर उभारण्याचे सार्थक आहे, असेही त्यांनी सांगितले.

महाराज पुढे म्हणाले की, अन्नमय कोषातूनच बाकी कोष कार्य करतात. अन्न उत्तम तर आनंद उत्तम. या आनंदातूनच प्रसन्नता निर्माण होते. स्वयंपाकघराच्या माध्यमातून परिवारातील सर्वांना ईश्वराकडे नेण्याचे अनमोल कार्य गृहिणी करतात. मात्र, अन्न सात्त्विक असणे अत्यंत आवश्यक आहे. स्वयंपाकघर पवित्र झाले, तर घरातील अर्ध्याहून अधिक समस्या कमी होतात, असा ठाम विश्वास त्यांनी व्यक्त केला.

वेदव्यासांनी १८ हजार श्लोकांचे भागवत महापुराण शुकदेवांना प्रदान केले आणि शुकदेवांनी राजा परिक्षितांना भागवत ऐकवले, अशी माहिती देत महाराजांनी सांगितले की, भागवत कथा कलीयुगातील भाविकांना सत्ययुगात राहण्याचा आनंद देते. दरम्यान, राधाकृष्ण महाराजांच्या अमृतवाणीमधून भागवत कथा श्रवण करण्यासाठी शहराच्या विविध भागातील भाविकांची मोठी गर्दी होत असून त्यात महिलांची उपस्थिती लक्षणीय आहे. भजनाचा आनंद लुटताना उपस्थित भाविक देहभान हरपून जात असल्याचे चित्र यावेळी दिसून आले.

शुद्ध भावनेने करा भगवंताचे गुणगान

लाखो रुपये कमवणाऱ्यांना देखील उत्तम भोजनाचे खरे सुख मिळत नाही, ही वस्तुस्थिती आहे. आलिशान हॉटेलमधील भोजनाची तुलना घरातील भोजनाशी कधीच होऊ शकत नाही. कारण हॉटेलमध्ये प्रधानता धनास असते, तर घरात प्रधानता आपलेपणास, माये-प्रेमास असते.
भगवंताच्या सेवेमुळे जीवनातील दैन्यता दूर होते. मात्र सेवा करताना अहंकार नसावा. अहंकार आल्यास भगवंत सेवा स्वीकारत नाही, असे सांगून राधाकृष्ण महाराजांनी नारद मुनींसारख्या शुद्ध भावनेने भगवंताचे गुणगान करण्याचे आवाहन केले.