Restraining Order: अहिल्यानगर : दहावी व बारावीच्या परीक्षा सुरळीत, शांततेत व कॉपीमुक्त वातावरणात पार पाडाव्यात, यासाठी प्रशासन सज्ज झाले आहे. याच पार्श्वभूमीवर शिर्डी उपविभागीय दंडाधिकारी माणिक आहेर यांनी राहाता व कोपरगाव तालुक्यातील परीक्षा केंद्रांच्या परिसरात भारतीय नागरी सुरक्षा संहिता 2023 चे कलम 163 अन्वये प्रतिबंधात्मक आदेश लागू केले आहेत.
महाराष्ट्र राज्य माध्यमिक व उच्च माध्यमिक शिक्षण मंडळाच्या माध्यमातून उच्च माध्यमिक प्रमाणपत्र परीक्षा (इयत्ता 12 वी) 10 फेब्रुवारी ते 18 मार्च 2026 या कालावधीत, तर माध्यमिक शालांत प्रमाणपत्र परीक्षा (इयत्ता 10 वी) 20 फेब्रुवारी ते 18 मार्च 2026 या कालावधीत होणार आहेत.
परीक्षेच्या कालावधीत परीक्षा केंद्राच्या 200 मीटर परिसरात परीक्षार्थी, परीक्षेच्या कामासाठी नियुक्त केलेले अधिकारी, कर्मचारी व उपविभागीय दंडाधिकारी यांनी परवानगी दिलेल्या व्यक्ती वगळता अन्य कोणत्याही व्यक्तीस प्रवेश करता येणार नाही. परिसरातील सर्व झेरॉक्स मशिन, फॅक्स मशिन, तसेच ध्वनीक्षेपक व तत्सम उपकरणे परीक्षा सुरु असलेल्या वेळेत पूर्णपणे बंद ठेवावी लागतील.
आदेशाचे उल्लंघन करणाऱ्यावर होणार कारवाई
परीक्षा केंद्राच्या २०० मीटर परिसरात मोबाईल फोन, पेजर, संगणक, लॅपटॉप इत्यादी साहित्याचा वापर करण्यास मनाई आहे. या आदेशाचे उल्लंघन करणाऱ्यांवर कायदेशीर कारवाई करण्यात येईल, असे प्रशासनाकडून स्पष्ट करण्यात आले आहे.
