Crime : अहिल्यानगर हादरलं; पुतण्याचा खून करून घर साफ; २४ तासांत गुन्ह्याचा पर्दाफाश
पारनेर तालुक्यातील भांडगाव येथे खून करून १२ लाख ७० हजार रुपयांची जबरी चोरी करणारा आरोपी स्थानिक गुन्हे शाखेने अवघ्या २४ तासांत अटक करून गुन्हा उघडकीस आणला.
Crime : अहिल्यानगर : पारनेर तालुक्यातील भांडगाव येथे खून करून १२ लाख ७० हजार रुपयांची जबरी चोरी करणारा आरोपी स्थानिक गुन्हे शाखेने अवघ्या २४ तासांत अटक करून गुन्हा उघडकीस आणला. आरोपीकडून रोख रक्कम, मोबाईल व दुचाकीसह एकूण १० लाख ८४ हजार रुपयांचा मुद्देमाल जप्त करण्यात आला आहे. पारनेर पोलीस ठाण्यात कलम १०३ (१), ३०९(४) प्रमाणे गुन्हा दाखल करण्यात आलेला आहे.
याबाबत माहिती अशी की, फिर्यादी सिद्धेश संदीप खरमाळे (रा. भुजवळवस्ती, भांडगाव) यांनी दिलेल्या तक्रारीनुसार त्यांच्या वडिलांवर अज्ञात इसमाने चोरीच्या उद्देशाने डोक्यात हत्याराने मारहाण करून त्यांना ठार केले व घरातील १२ लाख ७० हजार रुपयांची रोख रक्कम तसेच सोन्याचे दागिने चोरून नेले. त्यानंतर तत्काळ पोलिसांनी घटनास्थळी पाहणी करून गुप्त माहितीच्या आधारे तपास करत आरोपीची ओळख पटवली. महेश हनुमंत खरमाळे (वय ४५, रा. भुजवळवस्ती, भांडगाव) हा आरोपी भांडगाव ते जामगाव रस्त्यावर लाल-काळ्या रंगाच्या मोटारसायकलवर मागे बॉक्स बांधून जात असल्याची माहिती मिळाल्यानंतर तळ्याजवळ सापळा रचण्यात आला. संशयित दिसताच त्याला ताब्यात घेऊन चौकशी केली असता त्याने गुन्ह्याची कबुली दिली.
आरोपी महेश खरमाळे याने १५ मे २०२६ रोजी पहाटे आपल्या पुतण्या संदीप भास्कर खरमाळे याच्या घरी जाऊन हातोड्याने डोक्यात वार करून त्याला ठार मारल्याचे व घरातील रोख रक्कम चोरून नेल्याचे कबूल केले. पोलिसांनी आरोपीकडून १० लाख 84 हजार रुपये किमतीचा मुद्देमाल जप्त केला आहे. पुढील तपास पारनेर पोलीस ठाणे करीत आहे.
