FFS Digital Fertilizer Distribution System : शेतकऱ्यांची आता खतासाठी धावपळ नको; मोबाईलवरच साठा पाहा, खत आरक्षित करा

FFS Digital Fertilizer Distribution System : अहिल्यानगर : खतासाठी आता शेतकऱ्यांना दुकानांच्या फेऱ्या मारण्याची गरज भासणार नाही. ‘एफएफएस’ डिजिटल प्रणालीमुळे मोबाईलवरच खताचा उपलब्ध साठा पाहून पसंतीचे केंद्र निवडता येणार असून, आवश्यक खताचे आरक्षणही करता येणार आहे.

शेतकऱ्यांना आवश्यक ते खत पारदर्शक व सुलभ पद्धतीने उपलब्ध करून देण्यासाठी केंद्र व राज्य शासनाच्या संयुक्त विद्यमाने सुरू करण्यात आलेल्या ‘Framework for Fertilizer Sale (FFS)’ डिजिटल प्रणालीची जिल्ह्यात प्रभावी अंमलबजावणी करण्याचे निर्देश जिल्हाधिकारी डॉ. पंकज आशिया यांनी दिले.

प्रणालीच्या अंमलबजावणीबाबत जिल्हाधिकारी कार्यालयात जिल्हास्तरीय संनियंत्रण समितीची विशेष आढावा बैठक झाली. यावेळी खत नियोजन, ‘FFS’ ॲपची कार्यपद्धती आणि तंत्रज्ञानाधारित पारदर्शक खत वितरण व्यवस्था याबाबत सविस्तर चर्चा करण्यात आली.

जिल्ह्यातील सर्व शेतकरी बांधवांनी आधुनिक व पारदर्शक खत वितरणासाठी FFS ॲपचा जास्तीत जास्त वापर करून आवश्यक खतांचे आरक्षण करावे, तसेच ऐन हंगामात होणारी गैरसोय टाळावी, असे आवाहन जिल्हा अधीक्षक कृषी अधिकारी सुधाकर बोराळे यांनी केले. बैठकीस जिल्हा अधीक्षक कृषी अधिकारी सुधाकर बोराळे, कृषी विकास अधिकारी सुधीर शिंदे, विविध रासायनिक खत उत्पादक कंपन्यांचे प्रतिनिधी, जिल्हास्तरीय कृषी निविष्ठा संघटनेचे प्रतिनिधी छबुराव हराळ यांच्यासह कृषी विभागाचे अधिकारी उपस्थित होते.

शेतकऱ्यांना नेमका काय फायदा?

या डिजिटल प्रणालीद्वारे शेतकऱ्यांना त्यांच्या सातबारा व पीक नोंदीनुसार जमिनीच्या क्षेत्रफळावर आधारित आवश्यक खताचे प्रमाण सुचविले जाणार आहे. यामध्ये युरिया, डीएपी, एनपीकेएस आदी खतांची पिकाच्या गरजेनुसार शिफारस होणार असल्याने अनावश्यक खत खरेदी टाळता येऊन उत्पादन खर्चात बचत होणार आहे.
विशेष म्हणजे, शेतकरी दुकानात जाण्यापूर्वीच अधिकृत कृषी सेवा केंद्रांवरील उपलब्ध खतसाठा (Live Inventory) पाहून आपल्या पसंतीचे केंद्र निवडू शकतो. ॲपवर आरक्षण केल्यानंतर मिळणारा डिजिटल QR कोड e-PoS मशीनवर स्कॅन करून खत घेता येणार आहे. शेतकरी स्वतः किंवा अधिकृत प्रतिनिधीमार्फत तीन दिवसांच्या आत खत खरेदी करू शकणार आहे.

६५ हजार मेट्रिक टनांहून अधिक खतसाठा

जिल्ह्यात सध्या ६५ हजार मेट्रिक टनांपेक्षा अधिक खतांचा मुबलक साठा उपलब्ध असून खताची टंचाई भासण्याची शक्यता नसल्याचे बैठकीत स्पष्ट करण्यात आले. खत विक्री परवान्यांचे अद्ययावतीकरण पूर्ण झाले असून उर्वरित प्रकरणांतील तांत्रिक व प्रशासकीय प्रक्रिया वेळेत पूर्ण करण्याचे निर्देशही देण्यात आले.
खत वितरणात पारदर्शकता राहण्यासाठी गोदामातील प्रत्यक्ष साठा आणि e-PoS वरील डिजिटल साठा नियमितपणे अद्ययावत ठेवण्याचे निर्देश देण्यात आले.