Nagardevle : निरोगी आई, सुदृढ बाळाचा मंत्र; नागरदेवळेत सुरक्षित मातृत्व अभियानाला उत्स्फूर्त प्रतिसाद

Nagardevle : अहिल्यानगर : प्रधानमंत्री सुरक्षित मातृत्व अभियानांतर्गत नागरदेवळे प्राथमिक आरोग्य उपकेंद्र येथे गरोदर मातांसाठी विशेष आरोग्य तपासणी शिबिर उत्साहात पार पडले. या उपक्रमात सरस्वती हॉस्पिटलचे डॉ. अमोल जाधव यांनी गरोदर मातांची सखोल आरोग्य तपासणी करून गर्भावस्थेदरम्यान घ्यावयाची काळजी, संतुलित आहार, नियमित तपासणीचे महत्त्व तसेच सुरक्षित प्रसूतीबाबत मार्गदर्शन केले.

यावेळी समुदाय आरोग्य अधिकारी डॉ. विशाल घंगाळे, आरोग्य सेवक विवेक गुंड, प्रशांत लोंढे, सहायक परिचारिका स्मिता गायकवाड तसेच आशासेविका सोनाली धाडगे, कामिनी खेतमाळस, राझिया शेख, आशा धाडगे, मंगल दळवी, वैष्णवी काटकर आदी उपस्थित होत्या. उपस्थित आरोग्य कर्मचाऱ्यांनी गरोदर महिलांना नियमित तपासणी, लसीकरण, योग्य आहार व आरोग्यविषयक सल्ल्याचे महत्त्व पटवून देत अभियान यशस्वी करण्यासाठी सहकार्य केले.

प्रधानमंत्री सुरक्षित मातृत्व अभियान म्हणजे काय?

प्रधानमंत्री सुरक्षित मातृत्व अभियान (PMSMA) ही भारत सरकारच्या आरोग्य व कुटुंब कल्याण मंत्रालयाची महत्त्वाकांक्षी योजना असून, प्रत्येक महिन्याच्या ९ तारखेला सर्व गरोदर महिलांना मोफत आणि दर्जेदार प्रसूतीपूर्व (ANC) तपासणी उपलब्ध करून देण्याचा या अभियानाचा उद्देश आहे.

अभियानाची प्रमुख वैशिष्ट्ये

– गरोदर महिलांची तज्ज्ञ डॉक्टरांकडून मोफत आरोग्य तपासणी.
– रक्तदाब, हिमोग्लोबिन, वजन, लघवी, रक्तातील साखर आदी आवश्यक तपासण्या.
– उच्च जोखमीच्या (High-Risk) गर्भधारणेची वेळेत ओळख व पुढील उपचारासाठी संदर्भ.
– योग्य आहार, लसीकरण, औषधे आणि सुरक्षित प्रसूतीबाबत मार्गदर्शन.
– माता व नवजात बालकांचे आरोग्य सुधारून माता-बालमृत्यूचे प्रमाण कमी करणे.