Yellow Alert : अहिल्यानगरला दोन दिवसांचा ‘येलो अलर्ट’; आज-उद्या वादळी पावसाचा इशारा

Yellow Alert : अहिल्यानगर : भारतीय हवामान विभागाने अहिल्यानगर जिल्ह्यासाठी ३ व ४ जुलै रोजी ‘येलो अलर्ट’ जारी केला आहे. जिल्ह्यात काही ठिकाणी विजांच्या कडकडाटासह मध्यम स्वरूपाचा पाऊस आणि वादळी वारे वाहण्याची शक्यता व्यक्त केली आहे. संभाव्य जीवित व वित्तहानी टाळण्यासाठी नागरिकांनी आवश्यक ती खबरदारी घ्यावी, असे आवाहन निवासी उपजिल्हाधिकारी दादासाहेब गिते यांनी केले आहे.

जिल्हा प्रशासनाकडून शेतकऱ्यांना आवाहन करण्यात आले की शेतकऱ्यांनी शेतीमाल सुरक्षित ठिकाणी साठवून ठेवावा. बाजार समितीत विक्रीसाठी आणलेला किंवा आणण्याचे नियोजन असलेला माल पावसापासून सुरक्षित ठेवावा. जनावरांनाही सुरक्षित ठिकाणी हलवण्यात यावे. नागरिक, शेतकरी बांधव यांनी प्रशासनाने दिलेल्या सूचनांचे काटेकोरपणे पालन करावे.

प्रशासनाच्या खबरदारीच्या सूचना

-मेघगर्जना व वीज चमकत असताना झाडाखाली किंवा मोकळ्या मैदानात थांबू नका.

-वीजेचे खांब, ट्रान्सफॉर्मर, टॉवर, धातूचे कुंपण आणि लोंबकळणाऱ्या वीजवाहिन्यांपासून दूर राहा.

– वादळी वाऱ्याच्या वेळी झाडे, होर्डिंग्ज व जीर्ण इमारतींच्या परिसरात जाणे टाळा.

– धरण, नदी, ओढे व कालव्यांमध्ये उतरू नका; धोकादायक ठिकाणी सेल्फी काढणे टाळा.

-वादळ सुरू असताना शक्यतो घराबाहेर पडणे टाळा आणि विद्युत उपकरणांचा वापर मर्यादित ठेवा.

– आपत्कालीन परिस्थितीत तातडीने प्रशासनाशी संपर्क साधा. मदतीसाठी ११२ व १०७७ या हेल्पलाईन क्रमांकांवर संपर्क साधा.

.