Illegal Gutkha Seized : अहिल्यानगर : अलिशान कारमधून सुरू असलेल्या प्रतिबंधित गुटख्याच्या काळ्या धंद्यावर स्थानिक गुन्हे शाखेने श्रीगोंद्यात धडक कारवाई करत तब्बल २८ लाख ८८ हजार ३३० रुपयांचा मुद्देमाल जप्त केला. या कारवाईत तिघांना अटक करण्यात आली असून चार फरार आरोपींचा पोलीस कसून शोध घेत आहेत.
पोलीस अधीक्षक मुम्मका सुदर्शन यांच्या आदेशानुसार स्थानिक गुन्हे शाखेचे पोलीस निरीक्षक संतोष मुटकुळे यांच्या नेतृत्वाखालील पथकाने २९ जून रोजी श्रीगोंदा पोलीस ठाण्याच्या हद्दीत गस्त घालत असताना गुप्त माहितीच्या आधारे मुंढेकरवाडी येथे छापा टाकला. त्यावेळी एका घराजवळ उभ्या असलेल्या आलिशान कारमधून दुसऱ्या कारमध्ये गुटख्याच्या गोण्या भरताना तिघांना रंगेहाथ पकडण्यात आले.
अटक करण्यात आलेल्या आरोपींमध्ये अमोल रामदास जाधव (वय ३५), अनिल रतन कुरुमकर (वय ४३) आणि फरहान रेहमान बेपारी (वय २३) यांचा समावेश आहे. चौकशीत गुटखा सांगली जिल्ह्यातील जत येथून आणून श्रीगोंदा परिसरात विक्रीसाठी आणल्याची माहिती समोर आली. या प्रकरणात दीपक लोखंडे, अप्पू, माजीद आणि शोयेब तांबोळी हे आरोपी फरार असून त्यांचा शोध सुरू आहे.
कारवाईदरम्यान पोलिसांनी ६ लाख ३ हजार २०० रुपयांचा आरएमडी, विमल पान मसाला व सुगंधी तंबाखू, २२ लाख रुपयांच्या दोन चारचाकी गाड्या, ३० हजार १३० रुपयांची रोख रक्कम आणि ५५ हजार रुपयांचे तीन मोबाईल असा एकूण २८ लाख ८८ हजार ३३० रुपयांचा मुद्देमाल जप्त केला.
या प्रकरणी स्थानिक गुन्हे शाखेचे पोलीस अंमलदार मनोज साखरे यांच्या फिर्यादीवरून श्रीगोंदा पोलीस ठाण्यात भारतीय न्यायसंहिता तसेच अन्न सुरक्षा व मानके कायद्यान्वये गुन्हा दाखल करण्यात आला असून पुढील तपास श्रीगोंदा पोलीस करत आहेत.
जप्त केलेला मुद्देमाल
– दोन चारचाकी वाहने – २२ लाख रुपये
– गुटखा व सुगंधी तंबाखू – ६ लाख ३ हजार २०० रुपये
– रोख रक्कम – ३० हजार १३० रुपये
– तीन मोबाईल – ५५ हजार रुपये
– एकूण जप्ती – २८ लाख ८८ हजार ३३० रुपये
