NEET Re-Exam 2026 : वैद्यकीय प्रवेशाच्या स्वप्नांची उद्या कसोटी; अहिल्यानगरात नीट पुनर्परीक्षा

NEET Re-Exam 2026 : अहिल्यानगर : राष्ट्रीय परीक्षा संस्थेमार्फत (NTA) रविवार (ता. २१ जून २०२६ ) रोजी अहिल्यानगर जिल्ह्यात नीट (NEET-2026) पुनर्परीक्षा आयोजित करण्यात आली असून, जिल्ह्यातील १२ परीक्षा केंद्रांवर एकूण ५ हजार ३८५ विद्यार्थी परीक्षा देणार आहेत. परीक्षा दुपारी २ ते सायंकाळी ५.१५ या वेळेत होणार असून, दिव्यांग प्रवर्गातील पात्र उमेदवारांसाठी परीक्षा सायंकाळी ६.२० वाजेपर्यंत चालणार आहे.

परीक्षा सुरळीत, पारदर्शक आणि गैरप्रकारमुक्त वातावरणात पार पडावी, यासाठी जिल्हा प्रशासन, पोलीस विभाग आणि राष्ट्रीय परीक्षा संस्था यांनी व्यापक तयारी केली आहे. परीक्षा व्यवस्थापनासाठी १२ केंद्र अधीक्षक, १६ उपकेंद्र अधीक्षक, १६ निरीक्षक, २२५ कक्ष निरीक्षक, ३ एनटीए प्रतिनिधी व भरारी पथके, १२ कर्तव्य दंडाधिकारी, १०७ पोलीस कर्मचारी तसेच जिल्हा प्रशासनाचे २१ अधिकारी-कर्मचारी यांची नियुक्ती करण्यात आली आहे.

परीक्षा केंद्रांवर कडेकोट पोलीस बंदोबस्त ठेवण्यात येणार असून, भरारी पथके आणि कर्तव्य दंडाधिकारी यांच्यामार्फत सातत्याने देखरेख केली जाणार आहे. कायदा व सुव्यवस्था अबाधित राखण्यासाठी परीक्षा केंद्र परिसरात आवश्यक प्रतिबंधात्मक उपाययोजनाही करण्यात आल्या आहेत.

प्रवेशपत्रावरील सूचनांचे काटेकोर पालन करून उमेदवारांनी वेळेपूर्वी परीक्षा केंद्रावर उपस्थित राहावे, असे आवाहन प्रशासनाने केले आहे. मोबाईल फोन, स्मार्ट वॉच, ब्लूटूथ उपकरणे, इअरफोन, कॅल्क्युलेटर, पेन ड्राइव्ह, पुस्तके, नोट्स, पर्स, हँडबॅग तसेच कोणतेही इलेक्ट्रॉनिक अथवा गैरप्रकारास सहाय्यक साहित्य परीक्षा केंद्रात आणण्यास सक्त मनाई करण्यात आली आहे.
परीक्षा शांततापूर्ण आणि सुरळीत वातावरणात पार पडण्यासाठी उमेदवार, पालक आणि नागरिकांनी प्रशासनाला सहकार्य करावे, असे आवाहन जिल्हा प्रशासनाने केले आहे.

नीट पुनर्परीक्षा एका नजरेत

परीक्षा केंद्रे : १२
एकूण विद्यार्थी : ५,३८५
परीक्षा वेळ : दुपारी २ ते ५.१५
दिव्यांग उमेदवारांसाठी : सायं. ६.२० पर्यंत
कक्ष निरीक्षक : २२५
पोलीस कर्मचारी : १०७
भरारी पथके : ३
कर्तव्य दंडाधिकारी : १२