MPSC Preliminary Exam 2026 : एमपीएससी पूर्व परीक्षेसाठी जिल्हा सज्ज; १७,९४७ उमेदवारांची रविवारी कसोटी

MPSC Preliminary Exam 2026 : अहिल्यानगर : राज्यसेवेचे स्वप्न साकार करण्यासाठी तब्बल १७ हजारांहून अधिक उमेदवार महाराष्ट्र लोकसेवा आयोगाच्या (एमपीएससी) परीक्षेसाठी रविवारी मैदानात उतरणार असून, परीक्षा सुरळीत पार पडण्यासाठी जिल्हा प्रशासनाने कडक सुरक्षा आणि नियंत्रणाची उपाययोजना केली आहे.

१४ जून रोजी जिल्ह्यातील ५७ परीक्षा उपकेंद्रांवर १७ हजार ९४७ उमेदवार परीक्षा देणार आहेत. परीक्षा प्रक्रियेत कोणताही गैरप्रकार होऊ नये तसेच कायदा व सुव्यवस्था अबाधित राहावी यासाठी परीक्षा केंद्रांच्या १०० मीटर परिसरात सकाळी ७ ते सायंकाळी ६ वाजेपर्यंत प्रतिबंधात्मक आदेश लागू करण्यात आले आहेत.

महाराष्ट्र लोकसेवा आयोगाचे केंद्रप्रमुख तथा निवासी उपजिल्हाधिकारी दादासाहेब गीते यांनी हे आदेश जारी केले आहेत. परीक्षेच्या यशस्वी आयोजनासाठी प्रशासनाने व्यापक यंत्रणा उभारली असून १३ उपजिल्हाधिकारी दर्जाचे समन्वय अधिकारी, २ भरारी पथक अधिकारी, ५७ उपकेंद्रप्रमुख, १६१ पर्यवेक्षक, ८११ सहवेक्षकांसह विविध विभागांतील अधिकारी-कर्मचाऱ्यांची नियुक्ती करण्यात आली आहे.

उमेदवारांना सकाळी ९.३० वाजल्यापासून परीक्षा केंद्रात प्रवेश दिला जाणार असून, आयोगाने दिलेल्या सूचनांचे काटेकोर पालन करण्याचे आवाहन प्रशासनाने केले आहे. परीक्षा कक्षात मोबाईल, कॅल्क्युलेटर, डिजिटल डायरी, पेजर, मायक्रोफोन आदी इलेक्ट्रॉनिक साधनांवर बंदी घालण्यात आली आहे.

दरम्यान, परीक्षा केंद्रांच्या १०० मीटर परिसरातील सर्व एसटीडी बूथ, फॅक्स सेवा केंद्रे आणि झेरॉक्स दुकानेही परीक्षेच्या कालावधीत बंद ठेवण्याचे आदेश देण्यात आले आहेत. उमेदवारांनी प्रवेशपत्र आयोगाच्या संकेतस्थळावरूनच डाउनलोड करून घ्यावीत; दुय्यम प्रवेशपत्रे जिल्हाधिकारी कार्यालयातून उपलब्ध होणार नसल्याचे प्रशासनाने स्पष्ट केले आहे.

परीक्षेसाठी प्रशासनाची मोठी यंत्रणा

• उमेदवार : १७,९४७
• परीक्षा केंद्रे : ५७
• समन्वय अधिकारी : १३
• भरारी पथक अधिकारी : २
• पर्यवेक्षक : १६१
• सहवेक्षक : ८११
• इतर कर्मचारी व सहाय्यक : ५०० हून अधिक