Ahilyanagar Weather Alert : अहिल्यानगरकरांनो सावध रहा; हवामान खात्याचा येलो अलर्ट जारी

Ahilyanagar Weather Alert : अहिल्यानगर जिल्ह्यावर पुढील दोन दिवस वादळी वारे, मेघगर्जना आणि विजांचा धोका कायम राहणार असून हवामान खात्याने ‘येलो अलर्ट’ जारी केला आहे. संभाव्य नुकसान टाळण्यासाठी नागरिक, शेतकरी आणि पशुपालकांनी सतर्क राहून प्रशासनाच्या सूचनांचे काटेकोर पालन करावे, असे आवाहन जिल्हा प्रशासनाकडून करण्यात आले आहे.

भारतीय हवामान खात्याने अहिल्यानगर जिल्ह्यासाठी ८ ते ९ जूनदरम्यान ‘येलो अलर्ट’ जारी केला असून जिल्ह्यात तुरळक ठिकाणी मेघगर्जनेसह वादळी वारे, हलका ते मध्यम पाऊस तसेच विजांच्या कडकडाटाची शक्यता वर्तविली आहे.

हवामान विभागाच्या अंदाजानुसार वादळी वाऱ्यांचा वेग वाढण्याची शक्यता असून वीज पडण्याच्या घटनांचा धोका लक्षात घेता नागरिकांनी झाडाखाली, वीजवाहिन्यांजवळ, ट्रान्सफॉर्मर, मोबाईल टॉवर, होर्डिंग्ज तसेच मोकळ्या मैदानात थांबणे टाळावे, असे प्रशासनाने स्पष्ट केले आहे.

मेघगर्जना सुरू असताना विद्युत उपकरणांचा वापर टाळावा, धातूच्या वस्तूंपासून दूर राहावे आणि सुरक्षित इमारतीत आश्रय घ्यावा. वीजेच्या इशाऱ्यांसाठी केंद्र सरकारच्या ‘दामिनी’ अॅपचा वापर करण्याचे आवाहनही करण्यात आले आहे.
दरम्यान, धरण, नदी व कालव्यांमध्ये पर्यटनासाठी जाणाऱ्या नागरिकांनी विशेष खबरदारी घ्यावी. पाण्याच्या प्रवाहात उतरणे, धोकादायक ठिकाणी सेल्फी काढणे टाळावे, असेही प्रशासनाने म्हटले आहे.

वादळी वारे, पाऊस व संभाव्य गारपिटीमुळे शेतीमालाचे नुकसान होऊ नये, यासाठी शेतकऱ्यांनी शेतमाल सुरक्षित ठिकाणी साठवून ठेवावा. तसेच जनावरांचे सुरक्षित स्थळी स्थलांतर करण्याच्या सूचनाही देण्यात आल्या आहेत.
आपत्कालीन परिस्थितीत नागरिकांनी १०७७ (टोल फ्री) या क्रमांकांवर संपर्क साधावा, असे आवाहन प्रशासनाने केले आहे.