PM Surya Ghar Yojana : मोफत वीजेच्या दिशेने महाराष्ट्राची झेप; देशात अव्वल कामगिरी

PM Surya Ghar Yojana : अहिल्यानगर : घराघरांत सौरऊर्जेचा प्रकाश पोहोचवत महाराष्ट्राने प्रधानमंत्री सूर्यघर मोफत वीज योजनेत देशात अव्वल स्थान पटकावले आहे. एका दिवसात तब्बल ४,७०० घरांवर सौर प्रकल्प उभारण्याचा विक्रम करत राज्याने हरित ऊर्जेच्या क्षेत्रात नवा इतिहास रचला आहे.

मुख्यमंत्री देवेंद्र फडणवीस यांच्या मार्गदर्शनाखाली महावितरणमार्फत राबविण्यात येत असलेल्या प्रधानमंत्री सूर्यघर मोफत वीज योजनेत महाराष्ट्राने मे महिन्यात देशातील सर्वाधिक ४ लाख ४९ हजार अर्ज प्राप्त केले. तसेच सौर प्रकल्पांच्या तपासणीत प्रथम, कंत्राटदार नोंदणीत द्वितीय आणि एकूण प्रकल्प उभारणीत द्वितीय क्रमांक पटकावत महाराष्ट्राने देशातील टॉप पाच राज्यांमध्ये दमदार उपस्थिती नोंदविली आहे.

केंद्रीय नवीकरणीय ऊर्जामंत्री प्रल्हाद जोशी यांनी राज्याच्या या यशाबद्दल अभिनंदन करताना महाराष्ट्राच्या वेगवान प्रगतीचे विशेष कौतुक केले आहे. राज्याच्या अपर मुख्य सचिव (ऊर्जा) आभा शुक्ला तसेच महावितरणचे अध्यक्ष व व्यवस्थापकीय संचालक लोकेश चंद्र यांनीही अधिकारी आणि कर्मचाऱ्यांच्या कार्याचे अभिनंदन केले.

पंतप्रधान नरेंद्र मोदी यांच्या संकल्पनेतील या योजनेअंतर्गत घरगुती ग्राहकांना छतावरील सौरऊर्जा प्रकल्पासाठी थेट अनुदान दिले जाते. एक किलोवॅटसाठी ३० हजार रुपये, दोन किलोवॅटसाठी ६० हजार रुपये तर तीन किलोवॅटसाठी ७८ हजार रुपयांपर्यंत अनुदान उपलब्ध आहे.

मे महिन्यात राबविण्यात आलेल्या विशेष अभियानात महाराष्ट्राने देशभरात सर्वाधिक प्रतिसाद मिळवत अर्ज स्वीकृती, प्रकल्प उभारणी आणि तपासणी या तिन्ही महत्त्वाच्या टप्प्यांमध्ये उल्लेखनीय कामगिरी केली. यामुळे राज्यातील लाखो कुटुंबांच्या वीजबिलमुक्त भविष्यासह हरित ऊर्जेकडे वाटचाल अधिक वेगाने सुरू असल्याचे चित्र आहे.