Cheque Bounce : चेक बाऊन्स प्रकरणी कठोर निकाल; महिलेला तुरुंगवास, लाखोंची नुकसानभरपाई

Cheque Bounce : अहिल्यानगर : धनादेश अनादर प्रकरणी अतिरिक्त मुख्य न्यायदंडाधिकारी जी. जी. सोनी यांनी वैष्णवी विकेश गायकवाड हिला ३ महिन्यांची साधी कैद व ६ लाख ५४ हजार ६३७ रुपये नुकसानभरपाई देण्याचे आदेश दिले. रक्कम न भरल्यास आरोपी महिलेस आणखी ६ महिन्यांची साधी कैद भोगावी लागणार असल्याचा निकाल न्यायालयाने सुनावला.

याबाबत सविस्तर माहिती अशी की, आरोपी महिला वैष्णवी विकेश गायकवाड व फिर्यादी रोहित राजेंद्र बडे यांनी भागीदारीत व्यवसाय सुरू केला होता. काही कारणांमुळे रोहित बडे यांनी व्यवसायातून बाहेर पडण्याचा निर्णय घेतल्यानंतर त्यांना देय रक्कम निश्चित करण्यात आली. ती रक्कम देण्यासाठी आरोपी महिलेने फिर्यादीस धनादेश दिला. मात्र हा धनादेश बँकेत जमा केल्यानंतर तो अनादरित झाला.
यानंतर फिर्यादी रोहित बडे यांनी विधीज्ञ गोरक्ष पालवे यांच्यामार्फत आरोपी महिलेस नोटीस बजावून धनादेशाची रक्कम मागितली. मात्र रक्कम न मिळाल्याने फिर्यादीने निगोशिएबल इन्स्ट्रुमेंट अॅक्ट कलम १३८ अंतर्गत न्यायालयात खटला दाखल केला होता.

सदर खटल्याच्या सुनावणीनंतर न्यायालयाने आरोपी महिलेस दोषी ठरवून ३ महिन्यांची साधी कैद व ६ लाख ५४ हजार ६३७ रुपये नुकसानभरपाई फिर्यादीस देण्याचे आदेश दिले आहेत. तसेच नुकसानभरपाईची रक्कम न भरल्यास आरोपीस अतिरिक्त ६ महिन्यांची साधी कैद सुनावण्यात आली आहे.

या प्रकरणात फिर्यादी रोहित बडे यांच्यावतीने विधीज्ञ गोरक्ष पालवे यांनी प्रभावी युक्तिवाद केला. त्यांना अॅड. गुरविंदर पंजाबी, सागर गरजे, रोहित बुधवंत, राहुल दहिफळे, विशाल वांढेकर, धनश्री खेतमाळीस, रोहित चांडवले, विवेक बडे, पुष्कर बिडवाई, प्रवीण निंबाळकर, विवेकानंद बडे, तेजस राख, भक्ती तमनर, बाळकृष्ण गीते, यश केकान यांनी सहाय्य केले.