Ahilyanagar News : अहिल्यानगर : संगमनेर परिसरात बिअर बार व मद्यदुकाने फोडणाऱ्या आंतरराज्यीय टोळीला स्थानिक गुन्हे शाखेने गजाआड करत मोठे यश मिळविले आहे. या कारवाईत ५ गुन्हे उघडकीस आणून ५ लाख ५५ हजार १६० रुपयांचा मुद्देमाल जप्त करण्यात आला आहे.
संगमनेर तालुक्यातील घारगाव पोलीस ठाण्यात कलम ३०३ (२), ३३१(४) अन्वये ३ मे २०२६ रोजी गुन्हा दाखल झाला होता. या गुन्ह्यात फिर्यादी किशोर बाळाजी डोके (रा. खंदरमाळवाडी, ता. संगमनेर) यांच्या हॉटेल निलायम बार येथे अज्ञात चोरट्यांनी शटरचे कुलूप तोडून ३ लाख सहा हजार १९० रुपये किमतीची विदेशी दारू, सिगारेट व सीसीटीव्ही डीव्हीआर चोरून नेला होता.
या गुन्ह्याच्या तपासासाठी पोलीस निरीक्षक किरणकुमार कबाडी यांच्या नेतृत्वाखाली स्थानिक गुन्हे शाखेचे पोलीस उपनिरीक्षक महादेव गुट्टे यांच्यासह पोलीस अंमलदार गणेश लोंढे, विजय पवार, फुरकान शेख, बाळासाहेब गुंजाळ, योगेश कर्डिले, अमृत आढाव, महिला पोलीस अंमलदार सोनल भागवत व चालक महादेव भांड यांचे पथक तयार करण्यात आले.
पथकाने गोपनीय माहिती व तांत्रिक तपासाच्या आधारे हा गुन्हा हसन हमजा कुट्टी (रा. नाशिक) व त्याच्या साथीदारांनी केल्याचे निष्पन्न केले. त्यानुसार पोलिसांनी नाशिक येथील म्हाडा बिल्डींग, वडाळा परिसरात सापळा रचून आरोपी हसन हमजा कुट्टी, आकाश सचिन सूर्यवंशी, मेहताब गुलाम रसुल अन्सारी यांना ताब्यात घेतले. चौकशीत त्यांनी त्यांचा साथीदार बंटी दास (रा. झारखंड) हा फरार असल्याचे सांगून गुन्ह्याची कबुली दिली.
आरोपींकडून अधिक चौकशी केली असता चोरीचा माल नाशिक जिल्ह्यातील पळसे येथील हॉटेल लकी बार अँड रेस्टॉरंटचे चालक किरण रामदास उगले व विवेक अरुण उगले यांना चोरीचा असल्याचे सांगून विकल्याचे उघड झाले. तसेच विवेक उगले याने चोरीसाठी वाहन उपलब्ध करून दिल्याचे निष्पन्न झाले. त्यानंतर पोलिसांनी किरण रामदास उगले याला ताब्यात घेतले.
या कारवाईत आरोपींकडून ४ लाख ५ हजार १६० रुपये किमतीची विदेशी दारू, १ लाख ५० हजार रुपये किमतीची टाटा इंडिका कार तसेच कटर, मंकी मास्क, एअर पिस्टल, स्क्रू ड्रायव्हर असा एकूण ५ लाख ५५ हजार १६० रुपये किमतीचा मुद्देमाल जप्त करण्यात आला आहे.
तपासात आरोपींकडून आणखी गुन्हे उघडकीस आले असून अहिल्यानगर व नाशिक जिल्ह्यातील एकूण ५ गुन्हे त्यांच्या नावावर निष्पन्न झाले आहेत. पुढील तपास घारगाव पोलीस ठाणे करीत आहे.
