Indurikar Maharaj : इंदोरीकर महाराजांच्या मुलीच्या लग्नात चेनस्नॅचिंगचा थरार; दोन अटकेत, दोन फरार

Indurikar Maharaj : अहिल्यानगर : इंदोरीकर महाराज यांच्या मुलीच्या लग्न सोहळ्यात झालेल्या चेनस्नॅचिंग प्रकरणात स्थानिक गुन्हे शाखेने अहिल्यानगरने धडाकेबाज कारवाई करत दोघा आरोपींना अटक केली. आरोपींकडून ११.५ ग्रॅम सोन्यासह मोबाईल व मोटारसायकल असा एकूण २ लाख ८९ हजार ५०० रुपयांचा मुद्देमाल जप्त करण्यात आला असून दोन आरोपी फरार आहेत.

संगमनेर शहर पोलीस ठाण्यात कलम ३०३(२) प्रमाणे गुन्हा दाखल करण्यात आला होता. लग्नाच्या सोहळ्यात गर्दीचा फायदा घेत अज्ञात चोरट्याने फिर्यादीचे ६० ग्रॅम वजनाचे सोन्याचे दागिने बळजबरीने हिसकावून पळ काढला होता.

याबाबत माहिती अशी की, या प्रकरणाचा तपास करत असताना स्थानिक गुन्हे शाखेला खात्रीशीर माहिती मिळाली की, हा गुन्हा रेकॉर्डवरील आरोपी सागर सुरेश कांबळे (रा. श्रीरामपूर) याने साथीदारांसह केला असून चोरीतील सोन्याची वाटणी करण्यासाठी ते ममदापुर फाटा येथे मोटारसायकलवर येणार आहेत. त्यानुसार पथकाने सापळा रचून दोन संशयितांना ताब्यात घेतले.

ताब्यात घेतलेल्या आरोपींची नावे सागर सुरेश कांबळे (वय ३२, रा. रमानगर, श्रीरामपूर) व बबलू उर्फ अब्दुल इब्राहिम पिंजारी (वय ३६, रा. वार्ड नं. २, श्रीरामपूर) अशी आहेत. चौकशीत त्यांनी हा गुन्हा इतर साथीदार आतिक आयुब उर्फ आरिफ शेख व सनी विलास ढोकणे (दोघेही फरार) यांच्या मदतीने केल्याची कबुली दिली.

पोलिसांनी आरोपींकडून ११.५ ग्रॅम वजनाचे सोन्याचे दागिने (१,४९,५०० रु.), दोन मोबाईल (७०,००० रु.) व मोटारसायकल (७०,००० रु.) असा एकूण २,८९,५०० रुपयांचा मुद्देमाल जप्त केला आहे. ताब्यातील आरोपी व मुद्देमाल पुढील तपासासाठी संगमनेर शहर पोलीस ठाण्यात हजर करण्यात आले असून पुढील तपास सुरू आहे. ही कारवाई पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरण कुमार कबाडी यांच्या पथकाने केली आहे.