Ahilyanagar News : बालविवाहाला लगाम; एका दिवसात थांबवले ९ विवाह

Ahilyanagar News : अहिल्यानगर जिल्ह्यात महिला व बालविकास विभागाच्या सतर्कतेमुळे बालविवाहविरोधी कारवाईला मोठे यश मिळाले आहे. एकाच दिवसात तब्बल ९ बालविवाह थांबविण्यात प्रशासन यशस्वी झाले आहे. नगर शहरासह विविध तालुक्यांमध्ये ही धडक मोहीम राबविण्यात आली.

३ मे २०२६ रोजी जिल्हा महिला व बालविकास अधिकारी संजय कदम यांच्या मार्गदर्शनाखाली ही विशेष मोहीम प्रभावीपणे राबविण्यात आली. या अंतर्गत नगर शहरात ३, अकोले १, राहुरी १, श्रीगोंदा १, पाथर्डी १, नेवासा १ आणि नगर तालुका १ अशा एकूण ९ ठिकाणी बालविवाह रोखण्यात आले.

या मोहिमेत पोलीस प्रशासन, ग्रामसेवक, सरपंच-उपसरपंच, अंगणवाडी सेविका, मुख्यसेविका, जिल्हा बालसंरक्षण कक्ष आणि चाइल्ड हेल्पलाइन यांचा सक्रिय सहभाग राहिला. सर्व यंत्रणांनी समन्वयाने कार्य करत तातडीने घटनास्थळी पोहोचून बालविवाह थांबविण्याची कारवाई केली.

दरम्यान, बालविवाहाच्या घटनांची माहिती मिळाल्यास नागरिकांनी तात्काळ प्रशासन, पोलीस यंत्रणा किंवा चाइल्ड हेल्पलाइनकडे कळवून सहकार्य करावे, असे आवाहन महिला व बालविकास विभागाकडून करण्यात आले आहे.