Census : जनगणना म्हणजे राष्ट्राचा आरसा; कामात प्रामाणिकपणा हवा : जिल्हाधिकारी

Census : अहिल्यानगर : देशाच्या विकास नियोजनाचा पाया असलेल्या जनगणना प्रक्रियेत कोणतीही चूक होऊ नये, जनगणना म्हणजे राष्ट्राचा आरसा आहे. यासाठी प्रगणकांनी अचूक व प्रामाणिकपणे माहिती नोंदवावी, असे निर्देश जिल्हाधिकारी डॉ. पंकज आशिया यांनी दिले. कर्जत तालुक्यात सुरू असलेल्या प्रगणक प्रशिक्षणाला भेट देत त्यांनी शिस्त, समन्वय आणि नम्र संवादाचे महत्त्व अधोरेखित केले.

राष्ट्रीय जनगणनेच्या पार्श्वभूमीवर कर्जत तालुक्यात प्रगणकांना तज्ज्ञांकडून प्रशिक्षण दिले जात आहे. या प्रशिक्षण सत्राला जिल्हाधिकाऱ्यांनी भेट देऊन मार्गदर्शन केले. यावेळी उपविभागीय अधिकारी नितीन पाटील, निवासी नायब तहसीलदार महादेव कारंडे आदी उपस्थित होते.

जिल्हाधिकारी डॉ. आशिया म्हणाले, “जनगणना करताना नागरिकांशी संवाद साधताना नम्रता, संयम व विश्वासार्हता राखणे अत्यंत आवश्यक आहे. प्रत्येक घरातील माहिती पूर्णपणे व अचूकपणे नोंदवून कोणतीही त्रुटी राहणार नाही याची दक्षता घ्यावी. जनगणना प्रक्रिया यशस्वी करण्यासाठी समन्वय, सातत्य आणि शिस्त या बाबींना प्राधान्य देत काम वेळेत पूर्ण करावे,” असे त्यांनी सांगितले.

कर्जत तालुक्यात घरांची व कुटुंबांची सविस्तर माहिती संकलित करण्यासाठी सुमारे ६९ पर्यवेक्षक आणि ३५८ प्रगणकांची निवड करण्यात आली आहे. या सर्वांना टप्प्याटप्प्याने प्रशिक्षण देण्यात येत असून २३ एप्रिल २०२६ ते ०८ मे २०२६ या कालावधीत चार टप्प्यांत प्रशिक्षण आयोजित करण्यात आले आहे. प्रत्येक टप्प्यात तीन दिवस सखोल मार्गदर्शन केले जात आहे.