Maharashtra Rain Alert : राज्यात वादळी पावसाचा अलर्ट; शेतकऱ्यांनी खबरदारी घेण्याचे आवाहन

Maharashtra Rain Alert : अहिल्यानगर : हवामान विभागाने वर्तवलेल्या भाकितानुसार राज्यात आठवडाभर आभाळी हवामान राहणार आहे. तसेच ३० व ३१ मार्च रोजी राज्यातील काही भागांमध्ये विजांच्या कडकडाटासह अवकाळी पाऊस बरसण्याचा प्राथमिक अंदाज वर्तवला आहे. हा पाऊस प्रामुख्याने कर्नाटक व तेलंगणा सीमेलगत असलेल्या मराठवाडा, मध्य महाराष्ट्र व विदर्भातील सीमावर्ती भागांमध्ये राहण्याची शक्यता आहे.

३० मार्च दरम्यान राज्यातील काही भागांमध्ये प्रामुख्याने दुपारनंतर आभाळी हवामान तयार होऊन विजाच्या कडकडाटासह वादळी वाऱ्यांची स्थिती निर्माण होण्याचा प्राथमिक अंदाज आहे. सध्याच्या अंदाजानुसार ही स्थिती प्रामुख्याने खानदेश, मराठवाडा, पश्चिम विदर्भ तसेच मध्य महाराष्ट्रातील भागांमध्ये दिसून येऊ शकते. उर्वरित विदर्भात देखील हवामानात बदल दिसू शकतो. या दरम्यान विजांचा कडकडाट, वादळी वारे, पाऊस आणि काही ठिकाणी गारपिटीची शक्यता नाकारता येत नाही. ३१ मार्च रोजी देखील राज्याच्या काही भागांमध्ये या हवामानाचा परिणाम दिसू शकतो, असा अंदाज हवामान विभागाने वर्तवला आहे.

शेतीची कामे नियोजित करावी : कृषी विभाग

शेतकऱ्यांनी पुढील काही दिवस हवामानाच्या अंदाजांकडे लक्ष ठेवावे व त्यानुसार शेतीची कामे नियोजित करावीत. सध्या रब्बी पिकांची काढणी सुरू असल्याने शेतकऱ्यांनी काढणी केलेली पिके सुरक्षित ठिकाणी साठवून ठेवावीत किंवा झाकून ठेवण्याची व्यवस्था करावी. तसेच संभाव्य गारपीटीपासून पिकांचे नुकसान टाळण्यासाठी आवश्यक ती खबरदारी घ्यावी, असे आवाहन राज्याच्या कृषी विभागाकडून करण्यात आले आहे.