Petrol – Diesel : ‘हा’ नियम मोडला तर थेट गुन्हा; जिल्हादंडाधिकाऱ्यांचा पेट्रोल पंप चालकांना कडक इशारा

Petrol – Diesel : अहिल्यानगर : जिल्ह्यात कॅन, प्लास्टिक बाटली, डबा किंवा कोणत्याही भांड्यात पेट्रोल-डिझेल विक्रीवर बंदी घालण्यात आली आहे. पेट्रोल पंप चालकांनी इंधन फक्त वाहनांच्या इंधन टाकीतच भरावे, असे आदेश जिल्हाधिकारी डॉ. पंकज आशिया यांनी काढले आहेत. या आदेशाचे उल्लंघन केल्यास पेट्रोल पंप चालकांवर फौजदारी गुन्हा दाखल करण्यात येईल, असेही आदेशात स्पष्ट केले आहे.

सध्या सोशल मीडियावर पेट्रोल डिझेलच्या तुटवडा बाबत अफवा पसरत आहे. याच पार्श्वभूमीवर कायदा व सुव्यवस्था अबाधित राहावी, यासाठी जिल्हाधिकाऱ्यांनी पेट्रोलियम नियम २००२ मधील तरतुदींच्या आधारे हे आदेश तत्काळ प्रभावाने लागू केले आहेत. आदेशानुसार पेट्रोल पंप चालकांनी कोणत्याही परिस्थितीत सुट्या स्वरूपात इंधन देऊ नये, अशी सक्त ताकीद देण्यात आली आहे.
प्रशासनाने सर्व पेट्रोल पंपांना सीसीटीव्ही यंत्रणा कार्यरत ठेवणे तसेच इंधन विक्रीच्या नोंदी नियमितपणे ठेवणे बंधनकारक केले आहे. या आदेशाचे काटेकोर पालन करण्याची जबाबदारी पेट्रोल पंप मालक व व्यवस्थापकांवर राहणार आहे.

दरम्यान, आदेशाचे उल्लंघन झाल्यास संबंधितांवर पेट्रोलियम नियम २००२, भारतीय नागरिक सुरक्षा संहिता २०२३ तसेच आपत्ती व्यवस्थापन कायदा २००५ अंतर्गत दंडात्मक व फौजदारी स्वरूपाची कठोर कारवाई केली जाईल, असा स्पष्ट इशारा जिल्हाधिकाऱ्यांनी दिला आहे.

संयम राखण्याचे प्रशासनाचे आवाहन

अहिल्यानगर जिल्ह्यातील सर्व पेट्रोल पंपांवर इंधनाचा पुरेसा साठा उपलब्ध राहावा, यासाठी पेट्रोलियम कंपन्यांच्या व्यवस्थापकांना विशेष निर्देश देण्यात आले आहेत. प्रशासनाने नागरिकांना अफवांवर विश्वास न ठेवता संयम राखण्याचे आवाहन केले आहे.