Petrol Diesel News : अहिल्यानगर : अहिल्यानगर जिल्ह्यात पेट्रोल, डिझेल व गॅसचा मुबलक साठा उपलब्ध आहे. त्यामुळे सोशल मीडियावर जो कुणी इंधन तुटवड्याच्या अफवा पसरून नागरिकांची नाहक दिशाभूल करत आहे, अशा लोकांवर थेट गुन्हे दाखल करून कठोर कारवाई करण्यात येईल, असा इशारा जिल्हाधिकारी डॉ. पंकज आशिया यांनी दिला.
इंधनाच्या पार्श्वभूमीवर नुकतीच जिल्हाधिकारी कार्यालयामध्ये जिल्हाधिकारी डॉ. पंकज आशिया यांच्या अध्यक्षतेखाली, पोलीस अधीक्षक व पुरवठा विभागाच्या सर्व अधिकाऱ्यांसोबत एक महत्त्वपूर्ण आढावा बैठक पार पडली. जिल्हाधिकारी म्हणाले, “इंधनाची वितरण व्यवस्था अत्यंत सुरळीत सुरू आहे. सध्या सोशल मीडिया व व्हॉट्सॲपवर इंधन तुटवड्याबाबत पसरवल्या जाणाऱ्या बातम्या पूर्णपणे खोट्या व दिशाभूल करणाऱ्या आहेत. नागरिकांनी अशा कोणत्याही अफवांवर विश्वास ठेवू नये, पॅनिक होऊन पेट्रोल पंपांवर विनाकारण गर्दी करू नये,” असे आवाहनही त्यांनी केले.
