Rahuri Assembly Election : अहिल्यानगर : राहुरी विधानसभा पोटनिवडणुकीच्या पार्श्वभूमीवर निवडणूक खर्चाची काटेकोरपणे तपासणी करा, अशा सूचना जिल्हाधिकारी डॉ. पंकज आशिया यांनी दिली.
राहुरी विधानसभा मतदारसंघाबाबत नुकतीच जिल्हाधिकारी कार्यालयात बैठक पार पडली. यावेळी निवडणूक खर्च निरीक्षक व्ही. कुमार, जिल्हाधिकारी डॉ. पंकज आशिया, अपर पोलीस अधीक्षक वैभव कलबुर्मे, उपजिल्हा निवडणूक अधिकारी दत्तात्रय कवितके, जिल्हा परिषदेचे मुख्य वित्त व लेखा अधिकारी शैलेश मोरे आदी उपस्थित होते.
राहुरी विधानसभा निवडणुकीच्या पार्श्वभूमीवर स्थापन करण्यात आलेली सर्व भरारी पथके, स्थिर सर्वेक्षण पथके व नियंत्रण कक्षांनी कार्यान्वित करण्यात आले आहे. या सर्व पथकांनी दैनंदिन अहवाल वेळेत सादर करण्याचे निर्देश जिल्हाधिकाऱ्यांनी दिले.
खर्च निरीक्षक व्ही. कुमार म्हणाले, ”भारत निवडणूक आयोगाच्या नियमांनुसार सर्व नियमांचे काटेकोर पालन होणे आवश्यक आहे. बँकांमधील संशयास्पद व्यवहारांची माहिती थेट प्राप्तिकर विभागाला कळवणे गरजेचे आहे. राज्य उत्पादन शुल्क व पोलीस विभागाने अवैध मद्य व पैशांच्या वाहतुकीवर कारवाई करावी. स्थिर सर्वेक्षण पथकांनी तपासणी नाक्यांवर चोख बंदोबस्त ठेवावा. तसेच सर्व पथकांच्या वाहनांवर जीपीएस यंत्रणा कार्यान्वित करावी व त्यांच्या जागा अद्ययावत कराव्यात. व्हिडिओ सर्वेक्षण पथकाने राजकीय सभांचे चित्रीकरण करताना मंचाचा आकार, खुर्च्यांची सविस्तर नोंद घ्यावी. समाजमाध्यमांवरील प्रचारावरदेखील विशेष लक्ष ठेवावे व उमेदवारांच्या खर्चाची मर्यादा ४० लाख रुपये असल्याने खर्चाच्या नोंदी अद्ययावत ठेवाव्यात,” अशा सूचनाही त्यांनी दिल्या.
