Property Registration Update : अहिल्यानगर : आर्थिक वर्षाच्या शेवटच्या महिन्यात मालमत्ता खरेदीसाठी होणारी गर्दी लक्षात घेता, तसेच सरकारी उद्दिष्ट पूर्ण करण्यासाठी नोंदणी व मुद्रांक शुल्क विभागाने महत्त्वपूर्ण पाऊल उचलले आहे. त्यानुसार मार्च महिन्याच्या अखेरीस येणाऱ्या सुट्ट्यांमध्ये राज्यातील सर्व दुय्यम निबंधक कार्यालये सुरू राहणार आहे, अशी माहिती प्रशासनाकडून देण्यात आली आहे.
Property Registration Update
मार्च महिन्यात मालमत्ता खरेदी-विक्रीच्या व्यवहारांमध्ये मोठी वाढ होत आहे. १ एप्रिल २०२६ रोजी प्रसिद्ध होत असलेल्या बाजारमूल्य दर तक्त्यामध्ये स्थावर मिळकतीच्या दरात वाढ होण्याची शक्यता आहे. अनेक नागरिक नवीन आर्थिक वर्ष सुरू होण्यापूर्वी दस्त नोंदणी पूर्ण करण्यास प्राधान्य देतात. परिणामी मार्च महिन्यात नोंदणी कार्यालयांमध्ये मोठी गर्दी होत असते. नागरिकांची गैरसोय टाळण्यासाठी तसेच अधिकाधिक नोंदणी पूर्ण होण्यासाठी दि. २६, २८, २९ तसेच ३१ मार्च २०२६ या शासकीय सुट्टीच्या दिवसांमध्ये सर्व मुद्रांक जिल्हाधिकारी व सह दुय्यम निबंधक कार्यालये नियमित कामकाजाच्या दिवशीप्रमाणे सुरू राहणार आहे. त्यामुळे या सुविधेचा लाभ घेऊन नागरिकांनी दस्त नोंदणीची कामे वेळेत पूर्ण करावीत, असे आवाहनही प्रशासनाने केले आहे.
