Narmada puran : नर्मदा मातेच्या दोन्ही तिरांवर मराठी भाषेत ‘नर्मदा पुराण’चा दिव्य संदेश पोहोचवत अहिल्यानगरचे ज्येष्ठ साहित्यिक-पत्रकार हभप मिलिंद महाराज चवंडके यांनी देशात ऐतिहासिक कीर्तिमान प्रस्थापित केले आहे. नर्मदा किनाऱ्यावर मराठीत प्रवचन करणारे ते भारतातील पहिले प्रवचनकार ठरले असून, त्यांच्या या अभूतपूर्व कार्याबद्दल नर्मदा भक्तांकडून त्यांच्यावर अभिनंदनाचा वर्षाव होत आहे.
नर्मदेची पायी परिक्रमा करताना आणि त्यानंतरही आलेल्या अद्भुत आध्यात्मिक अनुभूतीतून हभप मिलिंद महाराज चवंडके यांनी प्रवचन सेवेच्या माध्यमातून ज्ञानयज्ञ सुरू केला. या प्रवचन सेवेचाच एक भाग म्हणून नर्मदा मातेच्या कृपेने त्यांना नर्मदा पुराणावर थेट नर्मदा नदीच्या घाटांवर प्रवचन करण्याची संधी लाभल्याची अंगावर शहारे आणणारी घटना घडली. पुणे जिल्ह्यातील पाटण येथील हभप कै. काशीनाथ महाराज भोसले यांचे सुपुत्र रामदास भोसले यांनी सेवानिवृत्त पोलिस अधिकारी दिलीप शिंदे आणि सेवानिवृत्त सेल्स टॅक्स निरीक्षक रामचंद्र तरडे यांच्या सहकार्याने बसद्वारे १५ दिवसांची नर्मदा परिक्रमा आयोजित केली होती. या परिक्रमेतील प्रत्येक मुक्कामी नर्मदा नदीच्या घाटांवर ‘नर्मदा पुराण’वर प्रवचन करण्यासाठी हभप मिलिंद महाराज चवंडके यांना विशेष निमंत्रित करण्यात आले होते. परिक्रमेबरोबरच नर्मदा पुराण कथा निरूपण सोहळ्याचे आयोजन करण्यात येणार असल्याची माहिती रामदास भोसले यांनी नावनोंदणीच्या वेळी भाविकांना प्रत्यक्ष भेटून दिल्याने भाविक भारावून गेले. बसद्वारे नर्मदा परिक्रमा करतानाच नर्मदा पुराणाचे श्रवण करण्याची संधी मिळणे, हे महाभाग्य असल्याच्या भावना भाविकांनी व्यक्त केल्या.
