District Planning Committee : अहिल्यानगर : राज्याचे उपमुख्यमंत्री एकनाथ शिंदे यांच्या नेतृत्वाखालील शिवसेनेचे नेते, माजी जिल्हा परिषद सदस्य तथा नगर तालुका पंचायत समितीचे माजी सभापती संदेश कार्ले यांची अहिल्यानगर जिल्हा नियोजन समितीच्या विशेष निमंत्रित सदस्यपदी नियुक्ती झाली आहे. या नियुक्तीमुळे नगर तालुक्यात शिंदे शिवसेनेला मोठी बळकटी मिळाल्याची चर्चा राजकीय वर्तुळात रंगली असून, आगामी जिल्हा परिषद व पंचायत समिती निवडणुकांच्या पार्श्वभूमीवर या निर्णयाला विशेष महत्त्व प्राप्त झाले आहे.
खंडाळा येथील रहिवासी असलेले संदेश कार्ले यांनी शिवसेनेतूनच राजकीय कारकीर्द सुरू केली. ते दोन वेळा जिल्हा परिषद सदस्य राहिले असून नगर पंचायत समितीचे सभापती म्हणूनही त्यांनी काम पाहिले आहे. घोसपुरी पाणीपुरवठा योजनेचे तब्बल दहा वर्षे अध्यक्ष म्हणून कार्य करताना त्यांनी तोट्यातील योजना सुमारे दोन कोटी रुपयांच्या नफ्यात आणत राज्यपातळीवर ठसा उमटविला.
ठाकरे शिवसेनेचे तालुकाप्रमुख व उपजिल्हाप्रमुख म्हणून त्यांनी नगर तालुक्यात पक्षसंघटना मजबूत करण्यासाठी गावोगावी शाखा स्थापन केल्या. गेल्या वर्षी त्यांनी उपमुख्यमंत्री एकनाथ शिंदे यांच्या शिवसेनेत प्रवेश केला. त्यांच्या कार्याची दखल घेत त्यांना जिल्हा नियोजन समितीवर विशेष निमंत्रित सदस्य म्हणून संधी देण्यात आली आहे.
या नियुक्तीनंतर भाजपचे युवा नेते डॉ. सुजय विखे पाटील यांनी त्यांचा सत्कार केला. नगर तालुक्यातील शिवसेनेचे कार्यकर्ते, माजी लोकप्रतिनिधी आणि पदाधिकाऱ्यांचे मजबूत संघटन कार्ले यांच्या पाठीशी असल्याने आगामी स्थानिक स्वराज्य संस्थांच्या निवडणुकांमध्ये त्यांची भूमिका निर्णायक ठरण्याची शक्यता व्यक्त केली जात आहे.
विधानसभा निवडणुकीतील बंडखोरी ठरली चर्चेचा विषय
गत विधानसभा निवडणुकीत पारनेर-नगर मतदारसंघातून संदेश कार्ले यांनी अपक्ष उमेदवारी दाखल करून सुमारे ११ हजारांहून अधिक मते मिळविली होती. या मतविभाजनाचा फटका महाविकास आघाडीच्या उमेदवार राणी लंके यांना बसल्याची चर्चा झाली होती. त्यानंतर महायुतीचे उमेदवार काशिनाथ दाते यांचा विजय झाला होता. त्यामुळे भविष्यात नगर तालुक्यातील राजकीय समीकरणांमध्ये कार्ले यांचे महत्त्व अधिक वाढल्याचे राजकीय जाणकारांचे मत आहे.
