Ahilyanagar Yellow Alert : अहिल्यानगरमध्ये ‘येलो अलर्ट’चा इशारा; प्रशासनाचा दक्षतेचा इशारा

Ahilyanagar Yellow Alert : अहिल्यानगर : भारतीय हवामान खात्याने अहिल्यानगर जिल्ह्यासाठी २२ ते २६ जूनदरम्यान ‘येलो अलर्ट’ जारी केला असून या कालावधीत तुरळक ठिकाणी मध्यम स्वरूपाचा पाऊस, विजांचा कडकडाटासह वादळी वाऱ्याची शक्यता वर्तविण्यात आली आहे. संभाव्य आपत्ती आणि जीवितहानी टाळण्यासाठी नागरिकांनी विशेष दक्षता बाळगावी, असे आवाहन निवासी उपजिल्हाधिकारी दादासाहेब गिते यांनी केले आहे.

हवामानातील बदलामुळे मेघगर्जना, विजांचा कडकडाट आणि वादळी वारे यांचा धोका वाढला असून नागरिकांनी झाडाखाली, मोकळ्या मैदानात किंवा उघड्या जागेत थांबणे टाळावे. तसेच जनावरांना सुरक्षित आश्रयस्थळी हलवावे. धरण, नदी आणि कालव्यांच्या परिसरात पर्यटनासाठी जाणाऱ्या नागरिकांनी विशेष खबरदारी घ्यावी. पाण्यात उतरणे किंवा धोकादायक ठिकाणी सेल्फी घेणे टाळावे, असेही प्रशासनाने स्पष्ट केले आहे.

नागरिकांसाठी प्रशासनाच्या सूचना

– वादळी वातावरणात झाडाखाली उभे राहू नका
– मोबाईल टॉवर, वीज खांब आणि धातूच्या वस्तूंपासून दूर राहा
– शेतमाल व जनावरे सुरक्षित ठिकाणी हलवा
– नदी, धरण व कालव्यात उतरणे टाळा
– आपत्कालीन परिस्थितीत ११२ किंवा १०७७ वर संपर्क साधा