El Nino Water Crisis : पाणीचोरांवर आता थेट वीजबंदी; एल-निनोच्या धोक्यामुळे जिल्हा प्रशासनाची कठोर भूमिका

El Nino Water Crisis : अहिल्यानगर : जिल्ह्यात एल-निनोच्या संभाव्य प्रभावामुळे निर्माण होणाऱ्या पाणीटंचाईच्या पार्श्वभूमीवर प्रशासन सतर्क झाले आहे. कालवे व बॅकवॉटरमधून होणारा अनधिकृत पाणी उपसा तत्काळ थांबवून संबंधितांचा वीजपुरवठा खंडित करण्याचे कठोर निर्देश जिल्हाधिकारी डॉ. पंकज आशिया यांनी दिले असून, पिण्याच्या पाण्याचे आरक्षण आणि उपलब्ध जलसाठ्याचे काटेकोर नियोजन करण्यावर भर दिला आहे.

जिल्हाधिकारी कार्यालयात आयोजित पाणीसाठा आरक्षण व कृषी नियोजनाबाबतच्या तातडीच्या आढावा बैठकीत ते बोलत होते. यावेळी निवासी उपजिल्हाधिकारी दादासाहेब गिते, जलसंपदा विभागाचे अधीक्षक अभियंता बाळासाहेब शेटे, कार्यकारी अभियंता सायली पाटील, जिल्हा अधीक्षक कृषी अधिकारी सुधाकर बोराळे यांच्यासह विविध विभागांचे अधिकारी उपस्थित होते.

पिण्याच्या पाण्याची संभाव्य टंचाई लक्षात घेऊन शेतीसाठी देण्यात येणारे पाणी आवर्तन तत्काळ बंद करण्याचे निर्देश देताना डॉ. आशिया यांनी जलसंपदा विभागाला पाणीचोरी रोखण्यासाठी भरारी पथके नियुक्त करण्यास सांगितले. अनधिकृत पाणी उपसा रोखण्यासाठी आवश्यकतेनुसार संबंधित विद्युत केंद्रांमधून वीजपुरवठा बंद करण्याचे आदेशही त्यांनी दिले.
महापालिका, नगरपालिका आणि स्थानिक स्वराज्य संस्थांनी उपलब्ध पाणीसाठ्यानुसार पाणीपुरवठ्याचे नियोजन करावे. आवश्यकतेनुसार नागरिकांना दिवसाआड पाणीपुरवठ्याबाबत निर्णय घेण्याच्या सूचनाही त्यांनी दिल्या. जलसंपदा विभागाने विद्यमान जलसाठ्याचा आढावा घेऊन पाण्याच्या सुयोग्य वापरासाठी सविस्तर कृती आराखडा सादर करावा, असेही त्यांनी स्पष्ट केले.
कृषी विभागाने शेतकऱ्यांना पुरेसा पाऊस आणि जमिनीत योग्य ओल निर्माण झाल्याशिवाय पेरणीची घाई करू नये, असा संदेश पोहोचवावा. खतांचा काळाबाजार किंवा लिकिंग होत नसल्याची खात्री करण्यासाठी भरारी पथकांमार्फत तपासणी करण्याचे आदेश देतानाच खत व बियाण्यांचा पुरवठा सुरळीत ठेवण्यावर भर देण्यात आला.
जिल्ह्यात सुरू असलेली जलसंधारण, गाळ काढणे आणि पाणी साठवण क्षमता वाढविण्याची कामे वेगाने पूर्ण करून उपलब्ध पावसाच्या प्रत्येक थेंबाचा साठा करण्यासाठी प्रशासनाने सज्ज राहावे, असे आवाहनही जिल्हाधिकारी डॉ. आशिया यांनी केले.

जिल्हाधिकाऱ्यांचे महत्त्वाचे निर्देश

– अनधिकृत पाणी उपसा तत्काळ बंद करा
– गरज पडल्यास वीजपुरवठा खंडित करा
– पिण्याच्या पाण्याचे आरक्षण प्राधान्याने राखा
– पेरणीची घाई करू नये, शेतकऱ्यांना मार्गदर्शन करा
– खतांचा काळाबाजार रोखण्यासाठी भरारी पथके सक्रिय करा
– जलसंधारण व गाळ काढण्याची कामे वेगाने पूर्ण करा