LPG GAS Cylinder : अहिल्यानगर : मागील काही दिवसांपासून महागाई, सोन्याच्या गगनाला भिडलेल्या दरांमुळे लग्नसराईवर मोठे संकट उभे राहिले आहे. त्यातच आता अमेरिका – इस्रायल- इराण युद्धामुळे गॅस टंचाईच्या झळा बसत आहे, त्यामुळे विवाह सोहळ्याच्या जेवणावळी कशा होणार?, असा प्रश्न वधू-वर पित्यासमोर निर्माण झाला आहे.
लग्न समारंभात पंगती उठण्यासाठी गॅस सिलेंडरची नितांत गरज पडते. लग्नात हजार, दोन हजार लोकांच्या जेवणावळी असतात. मात्र, ऐन लग्नसराईत गॅसचा तुटवडा निर्माण झाल्याने अनेक कुटुंबांना विवाह सोहळा पुढे ढकलण्याची वेळ आली आहे. राज्यात अनेक केटरर्सनी लग्न समारंभातील जेवणाच्या ऑर्डर रद्द करायला सुरुवात केली आहे. त्यामुळे बहुतांश कुटुंबांच्या आनंदाच्या क्षणांवर चिंतेचे सावट पसरले आहे.
केटरर्ससमोर संकट
एप्रिल आणि मे महिन्यांत मोठ्या प्रमाणात लग्नाचे मुहूर्त आहे. मात्र, ऐन लग्नसराईच्या तोंडावरच गॅसचा तुटवडा निर्माण झाल्याने केटरर्ससमोर मोठा पेच निर्माण झाला आहे.
लग्नसराईचा हंगाम धोक्यात येण्याची भीती
लग्नासाठी हॉल, डेकोरेशन, वाजंत्री यांसारख्या अनेक गोष्टींची आधीच बुकिंग केलेली असते. मात्र, केटरिंग व्यवस्था कोलमडल्यास संपूर्ण विवाह समारंभाचं नियोजन विस्कळीत होण्याची भीती आहे. त्यामुळे प्रशासनाने तातडीने व्यावसायिक गॅसचा पुरवठा सुरळीत करण्यासाठी प्रभावी उपाययोजना केल्या नाहीत, तर लग्नसराईचा हंगामच धोक्यात येण्याची भीती केटरर्स आणि कुटुंबीयांकडून व्यक्त केली जात आहे.
