LPG GAS : अहिल्यानगर : जिल्ह्यात एलपीजी गॅसच्या पुरवठ्याबाबत नागरिकांनी कोणत्याही अफवांवर अजिबात विश्वास ठेवू नये. जिल्ह्यात गॅसचा पुरेसा साठा उपलब्ध असून नागरिकांना कोणतीही अडचण येऊ देणार नाही, अशी ग्वाही जिल्हाधिकारी डॉ. पंकज आशिया यांनी दिली.
गॅस पुरवठ्याच्या स्थितीचा आढावा घेण्यासाठी जिल्हाधिकारी कार्यालयात झालेल्या बैठकीत त्यांनी प्रशासनाला स्पष्ट निर्देश दिले की, जिल्ह्यातील एलपीजी गॅस गोदामांची विशेष पथकामार्फत अचानक तपासणी करण्यात यावी. कृत्रिम टंचाई निर्माण करून नागरिकांची दिशाभूल करणाऱ्यांवर कडक कारवाई करण्यात येईल, असेही त्यांनी सांगितले.
या बैठकीस जिल्हा पुरवठा अधिकारी हेमा बडे, सहायक जिल्हा पुरवठा अधिकारी एम. के. चौधरी, बीपीसीएलचे राजकुमार मिश्रा, तसेच विविध गॅस कंपन्यांचे प्रतिनिधी व वितरक उपस्थित होते.
जिल्हाधिकारी म्हणाले, ग्राहकांनी गॅस सिलिंडरसाठी ई-केवायसी प्रक्रिया पूर्ण करावी आणि अधिकृत पुरवठादारांकडूनच गॅस घ्यावा. गॅस वितरण नियमानुसार होत असल्याची खात्री करून घ्यावी तसेच ऑनलाईन नोंदणी करूनच सिलिंडरची मागणी करावी.
गॅस वितरणात पारदर्शकता राखून ग्राहकांना वेळेत सेवा देण्याचे निर्देशही गॅस एजन्सींना देण्यात आले आहेत.
तक्रार असल्यास येथे संपर्क करा
भारत पेट्रोलियम – १८००२२४३४४
इंडियन ऑइल – १८००-२३३३-५५५
हिंदुस्तान पेट्रोलियम – १८००-२३३३-५५५
जिल्हाधिकारी कार्यालय आपत्ती कक्ष – १०७७
