LPG prices : व्यावसायिक एलपीजी गॅसच्या दरांनी अवघ्या पाच महिन्यांत दुप्पट उसळी घेतल्याने हॉटेल, रेस्टॉरंट आणि केटरिंग व्यवसायासमोर मोठे आर्थिक संकट उभे ठाकले आहे. पेट्रोल-डिझेलनंतर आता गॅस दरवाढीने महागाईच्या आगीत आणखी तेल ओतले आहे.
नव्या दरानुसार, दिल्लीत १९ किलोच्या व्यावसायिक एलपीजी सिलेंडरच्या किमतीत ४२ रुपयांची वाढ होऊन तो आता ३,११३.५० रुपयांना मिळणार आहे. कोलकात्यात सर्वाधिक ५३.५० रुपयांची वाढ झाली असून तेथील दर ३,२५५.५० रुपयांवर पोहोचले आहेत. केवळ मोठ्या सिलेंडरपुरतेच हे संकट मर्यादित नसून, ५ किलोच्या फ्री ट्रेड एलपीजी सिलेंडरच्या किमतीतही ११ रुपयांची वाढ करण्यात आली आहे. दिल्लीत हा सिलेंडर आता ८२१.५० रुपयांना मिळणार असून, विद्यार्थी, नोकरदार आणि एकटे राहणाऱ्या नागरिकांच्या खिशावर त्याचा थेट परिणाम होणार आहे.
विशेष म्हणजे, जानेवारी २०२६ मध्ये दिल्लीत १९ किलोच्या व्यावसायिक सिलेंडरची किंमत १,६९१.५० रुपये होती. मात्र केवळ पाच महिन्यांत ती तब्बल १,४२२ रुपयांनी वाढून ३,११३.५० रुपयांवर पोहोचली आहे. या अभूतपूर्व दरवाढीमुळे व्यावसायिक वर्गात तीव्र नाराजी व्यक्त होत आहे.
गॅस, इंधन आणि वाहतूक खर्चात सातत्याने होत असलेल्या वाढीमुळे हॉटेल, रेस्टॉरंट आणि केटरिंग व्यवसायिकांसमोर मोठे आर्थिक संकट उभे राहिले आहे. वाढीव खर्चाचा भार ग्राहकांवर टाकायचा की स्वतः सहन करायचा, असा पेच अनेक व्यावसायिकांसमोर निर्माण झाला आहे.
