Rahuri Election : लाखांची आघाडी, विरोधकांचा धुव्वा; राहुरीत अक्षय कर्डिलेंचा ऐतिहासिक विजय

Rahuri Election  : अहिल्यानगर : राहुरी पोटनिवडणुकीत भाजपचे अक्षय कर्डिले यांनी १ लाख १२ हजार ५८७ मताधिक्याने ऐतिहासिक विजय मिळवत विरोधकांचा धुव्वा उडवला. २७ फेऱ्यांमध्ये पहिल्यापासून आघाडी कायम ठेवत भाजपने राहुरीतील आपला गड पुन्हा मजबूतपणे राखला

अहिल्यानगर जिल्ह्यासह संपूर्ण राज्याचे लक्ष लागून राहिलेल्या राहुरी विधानसभा पोटनिवडणुकीचा निकाल अखेर स्पष्ट झाला आहे. या निवडणुकीत भारतीय जनता पक्षाचे उमेदवार अक्षय कर्डिले यांनी ऐतिहासिक विजय नोंदवला आहे. ज्येष्ठ नेते शिवाजीराव कर्डिले यांच्या निधनामुळे रिक्त झालेल्या या जागेवर भाजपने अक्षय कर्डिले यांच्यावर विश्वास टाकला होता. त्या विश्वासाला सार्थ ठरवीत अक्षय कर्डिले यांनी विरोधकांचा लाखोच्या मतांनी दारुण पराभव केला आहे.

राहुरी पोटनिवडणुकीत भाजपचे उमेदवार अक्षय कर्डिले हे महायुतीचे उमेदवार होते. त्यांच्याविरुद्ध राष्ट्रवादी काँग्रेस पक्षाचे (शरदचंद्र पवार ) उमेदवार गोविंद मोकाटे, वंचितचे संतोष चोळके आणि शिवसेना उद्धव बाळासाहेब ठाकरे सेना पक्षाचे बंडखोर उमेदवार रावसाहेब खेवरे यांचे आव्हान होते. मात्र, अक्षय कर्डिले यांनी मतमोजणीत पहिल्या फेरीपासून आघाडी घेत विरोधकांचा सुपडा साफ केला. त्यामुळे भाजपच्या गोटात उत्साहाचे आणि समाधानाचे वातावरण आहे.

दरम्यान, आज सकाळी मतमोजणीला पोलिसांचा मोठा फौज फाटा तैनात होता. कडक बंदोबस्तात मतमोजणीला सुरुवात झाली. मतमोजणी प्रक्रियेत पहिल्या फेरीपासूनच कर्डिले यांनी आपली आघाडी कायम ठेवली होती. आपल्या प्रतिस्पर्ध्यांना मोठ्या फरकाने मागे टाकत अखेर १ लाख १२ हजार ५८७ मतांनी ऐतिहासिक विजय मिळवला.

मतदारांचा विश्वास जपणारच : कर्डिले

माझे वडील सामान्य लोकांमध्ये राहिले. त्यांनी त्यांचं आयुष्य लोकांच्या सेवेसाठी समर्पित केलं आणि आज त्याचं फळ म्हणून जनतेने आज मला एकटं सोडलं नाही. ही निवडणूक सामान्य जनतेने हातात घेतल्याने विजय सुरुवातीपासूनच निश्चित होता. मतदारांचा विश्वास मी शेवटपर्यंत जपणारच, अशी भावना अक्षय कर्डिले यांनी व्यक्त केली.