Census : जनगणनेच्या कामात दिरंगाई चालणार नाही; जिल्हाधिकार्‍यांचे स्पष्ट निर्देश

Census : अहिल्यानगर : आगामी राष्ट्रीय जनगणनेच्या पार्श्वभूमीवर सुरू असलेले घरयादी गटनिश्चिती व सीमांकन तसेच नकाशे तयार करण्याचे काम दिलेल्या मुदतीत पूर्ण करावे, अशा स्पष्ट सूचना जिल्हाधिकारी डॉ. पंकज आशिया यांनी दिल्या. जनगणनेसारख्या राष्ट्रीय महत्त्वाच्या कामात कोणतीही दिरंगाई चालणार नसून, आवश्यक तेथे सुटीच्या दिवशीही काम सुरू ठेवून २० एप्रिलच्या आत काम पूर्ण करण्याचे निर्देश त्यांनी दिले.

जिल्हाधिकारी कार्यालयातून दूरदृश्य प्रणालीद्वारे आयोजित आढावा बैठकीत ते बोलत होते. बैठकीला जिल्ह्यातील सर्व तहसीलदार, नगरपरिषदांचे मुख्याधिकारी तसेच जनगणनेचे नोडल अधिकारी उपस्थित होते.

जिल्हाधिकारी डॉ. आशिया यांनी तालुका व नगरपरिषदनिहाय प्रगतीचा सविस्तर आढावा घेतला. काही ठिकाणी काम संथगतीने सुरू असल्याचे निदर्शनास आल्याने संबंधित अधिकाऱ्यांनी तातडीने गती वाढवून वेळेत काम पूर्ण करावे, असे त्यांनी स्पष्ट केले. बैठकीस अनुपस्थित राहणारे तसेच कामात अपेक्षित प्रगती न दाखवणाऱ्या अधिकाऱ्यांनी त्वरित सुधारणा करावी, अशा कडक सूचनाही त्यांनी दिल्या.
दरम्यान, जनगणनेसाठी नियुक्त करण्यात येणाऱ्या प्रगणक व पर्यवेक्षकांची माहिती सीएमएमएस पोर्टलवर सोमवार सकाळपर्यंत अद्ययावत करण्याचे निर्देश प्रशासनाकडून देण्यात आले आहेत. माहिती भरताना लवकरच सेवानिवृत्त होणारे कर्मचारी किंवा वैद्यकीय रजेवर असलेल्यांची नावे वगळण्याची दक्षता घ्यावी, असेही जिल्हाधिकाऱ्यांनी सांगितले.

एकदा पोर्टलवरील माहिती अंतिम केल्यानंतर त्यात बदल करता येणार नाही. त्यामुळे तहसीलदार व मुख्याधिकाऱ्यांनी स्वतः लक्ष घालून माहितीची अचूकता तपासण्याचे निर्देश देण्यात आले.
यावेळी जनगणनेचे अधिकारी श्रीकांत बनकर यांनी पुढील प्रक्रियेबाबत मार्गदर्शन केले. पर्यवेक्षकीय मंडळ तयार करताना एका प्रगणकाला साधारण ८०० ते ९०० लोकसंख्येचे समान काम दिले जाईल, याची काळजी घेण्याच्या सूचना त्यांनी दिल्या. तसेच, प्रगणक व पर्यवेक्षकांचे प्रशिक्षण २३ एप्रिलपासून सुरू होणार असून प्रशिक्षणाचा दर्जा राखण्यासाठी दोन तुकड्या एकत्र न करता प्रत्येक तुकडीचे स्वतंत्र प्रशिक्षण घेण्याचे निर्देश देण्यात आले. प्रशिक्षणापूर्वीच नियुक्तीपत्रे व ओळखपत्रे वितरित करण्यात यावीत, असेही त्यांनी स्पष्ट केले.