Shri Indresh Upadhyay : श्रीकृष्णाचं नामचिंतन हाच मुक्तीचा महामार्ग; इंद्रेश उपाध्याय यांचे प्रतिपादन

Shri Indresh Upadhyay : अहिल्यानगर : कलीयुगाच्या प्रभावातून मुक्ती मिळवण्यासाठी भगवान श्रीकृष्णाचे नामचिंतन हाच सर्वोत्तम मार्ग आहे, असे प्रतिपादन वृंदावन निवासी परम श्रद्धेय पूज्य इंद्रेश उपाध्याय यांनी अहिल्यानगरमध्ये केले. दरम्यान, दहीहंडी फोडत झालेल्या भव्य नंदोत्सवात हजारो भाविक भक्तिरसात चिंब झाले.

सावेडीतील मिस्कीन मळा येथे आयोजित श्रीमद् भागवत कथा ज्ञानयज्ञाच्या तृतीय पुष्पात ते बोलत होते. यावेळी दहीहंडी फोडत झालेल्या भव्य नंदोत्सव सोहळ्यात हजारो श्रोते भक्तिरसात चिंब झाले. कौशल्यादेवी गौरीशंकर गुप्ता, महेश गुप्ता आणि आयुष गुप्ता यांच्यातर्फे आयोजित या भागवत कथा सोहळ्याला भाविकांचा मोठा प्रतिसाद लाभला. सुधीर झालानी, किसनलाल बंग व प्रदीप पंजाबी यांच्यासह शहरातील प्रतिष्ठित भाविकांनी नंदोत्सवाची जय्यत तयारी केली होती.

व्यासपीठासमोरील प्रशस्त मंडपात तब्बल १५ आकर्षक दहीहंड्या बांधण्यात आल्या होत्या.
पूज्य इंद्रेश उपाध्याय पुढे म्हणाले, “जुगार, पैज लावणे, मदिरापान, व्यसनाधीनता, मांसाहार, हिंसा, खोटे बोलणे, अनैतिक कर्म व परस्त्रीगमन हे सर्व कलीयुगाच्या प्रभावाखाली येते. लक्ष्मीदेवीला समोर ठेवून जुगार खेळणे अथवा पैज लावणे यामुळे प्रत्यक्ष नारायण क्रोधित होतात. मांसाहार ही हिंसाच असल्याने महापाप आहे. नशा देणाऱ्या पदार्थांपासून नेहमी दूर राहा, देवतांशी नशेचा संबंध जोडू नका, असे त्यांनी स्पष्टपणे सांगितले.

आई-वडील आणि गुरु यांचा आदर करणे हे जीवनातील सर्वोच्च कर्तव्य असून त्यांचा शब्द प्रमाण मानल्यास कल्याण निश्चित होते. संत, साधू, महात्मे, भक्त आणि मंदिर यांची चेष्टा कधीही करू नका, असे आवाहनही इंद्रेश उपाध्याय महाराजांनी केले.

भगवंताच्या नामस्मरणाने जीवनाचे सार्थक

“भगवंताच्या नामस्मरणाने जीवनाचे कल्याण होते. अखेरचा श्वास घेताना मुखातून भगवंताचे नाव निघाले तरच मुक्ती मिळते. भगवंत भक्तांच्या डोळ्यातील अश्रू पाहू शकत नाहीत. वृंदावनात २४ तास राहिल्यास भगवान श्रीकृष्णांची भेट होतेच, मात्र त्या भेटीचा आनंद घेता आला पाहिजे. प्रेम करावेसे वाटले तर विठ्ठलावर, पांडुरंगावर, श्रीकृष्णावर प्रेम करा. भगवंताचे प्रेम मिळाले की इतर कोणत्याही अपेक्षा राहत नाहीत आणि जीवन सार्थक होते”, असे इंद्रेश उपाध्याय यांनी सांगितले.

दरम्यान, २१ दिवसांच्या नंदोत्सवाची माहिती दिल्यानंतर इंद्रेश उपाध्याय यांनी स्वतः दहीहंडी फोडण्यास सुरुवात केली. त्यानंतर उपस्थित भाविकांनी नंदोत्सवाचा मनमुराद आनंद लुटला. कर्णमधूर संगीताचे सूर आणि श्रीकृष्ण नामाचा जयजयकार यामुळे परिसर भक्तिमय वातावरणाने भारावून गेला. शहराच्या इतिहासात प्रथमच असा शाही नंदोत्सव सोहळा झाल्याच्या प्रतिक्रिया भाविकांमधून उमटल्या.

भगवंताच्या नामस्मरणाने जीवनाचे सार्थक

“भगवंताच्या नामस्मरणाने जीवनाचे कल्याण होते. अखेरचा श्वास घेताना मुखातून भगवंताचे नाव निघाले तरच मुक्ती मिळते. भगवंत भक्तांच्या डोळ्यातील अश्रू पाहू शकत नाहीत. वृंदावनात २४ तास राहिल्यास भगवान श्रीकृष्णांची भेट होतेच, मात्र त्या भेटीचा आनंद घेता आला पाहिजे. प्रेम करावेसे वाटले तर विठ्ठलावर, पांडुरंगावर, श्रीकृष्णावर प्रेम करा. भगवंताचे प्रेम मिळाले की इतर कोणत्याही अपेक्षा राहत नाहीत आणि जीवन सार्थक होते”, असे इंद्रेश उपाध्याय यांनी सांगितले.