milk adulteration : अहिल्यानगर : जामखेड तालुक्यातील फक्राबाद येथील रसायनापासून बनावट दूध तयार करणाऱ्या दूध संकलन केंद्रावर स्थानिक गुन्हे शाखेने नुकताच छापा टाकला. या कारवाईत तब्बल 17 लाख 32 हजार 816 रुपयांचा मुद्देमाल जप्त करण्यात आला असून तिघांना अटक करण्यात आली आहे.
याबाबत मिळालेल्या माहितीनुसार पोलीस अधीक्षक सोमनाथ घार्गे यांच्या आदेशानुसार स्थानिक गुन्हे शाखेचे पोलीस निरीक्षक किरणकुमार कबाडी यांच्या नेतृत्वाखाली पथक दूध भेसळ प्रकरणांचा तपास करत होते. त्यावेळी रामदास नवनाथ उबाळे (रा. फक्राबाद, ता. जामखेड) हा त्याच्या दूध संकलन केंद्रात रसायनापासून दूध तयार करून ते संकलित दुधात मिसळत असल्याची माहिती मिळाली. या माहितीच्या आधारे अन्न सुरक्षा अधिकारी राजेश बडे यांच्या उपस्थितीत छापा टाकण्यात आला. त्यावेळी समीर कमरुद्दीन शेख (वय 30, रा. उंबरे, ता. राहुरी), आफताब कलीम शेख (वय 28, रा. राहुरी) आणि रामदास नवनाथ उबाळे (वय 46, रा. फक्राबाद, ता. जामखेड) हे तिघे मिळून आढळून आले.
असा आढळला साठा
या छाप्यात 1198 लीटर पॅराफिन केमिकल, 300 किलो पांढरी पावडर आणि 320 लीटर बनावट दूध असा साठा आढळला. या रसायनापासून तब्बल 24 हजार लीटर बनावट दूध तयार करता येत असल्याची माहिती आरोपींनी दिली. अन्न सुरक्षा अधिकाऱ्यांनी हे दूध मानवी आरोग्यास अत्यंत घातक असल्याचे सांगितले. या कारवाईत 2 लाख 39 हजार 600 रुपयांचे पॅराफिन ऑईल, 81 हजार 56 रुपयांची पावडर, 12 हजार 160 रुपयांचे बनावट दूध आणि 14 लाख रुपयांची दोन पिकअप वाहने असा एकूण 17 लाख 32 हजार 816 रुपयांचा मुद्देमाल जप्त करण्यात आला. याप्रकरणी जामखेड पोलीस ठाण्यात भारतीय न्याय संहिता 2023 तसेच अन्न सुरक्षा व मानके कायद्यानुसार गुन्हा दाखल करण्यात आला असून पुढील तपास स्थानिक गुन्हे शाखा करीत आहे.
