Ahilyanagar : ‘ब्लॅक फिल्म’विरोधात पोलिसांची कारवाई; ४५८ वाहनांना ठोठावला लाखोंचा दंड

Ahilyanagar : ​अहिल्यानगर : बेकायदेशीरपणे लावण्यात येणाऱ्या ‘ब्लॅक फिल्म’विरोधात जिल्ह्यात प्रादेशिक परिवहन विभागाने पोलीस प्रशासनाच्या सहकार्याने विशेष मोहीम राबवली. 28 जानेवारी ते 2 फेब्रुवारी या कालावधीत राबविण्यात आलेल्या मोहिमेत एकूण 2 हजार 21 वाहनांची तपासणी करण्यात आली. यात नियमांचा भंग केलेल्या 458 वाहनांवर कठोर कारवाई करण्यात आली असून, एकूण 6 लाख 46 हजार रुपयांचा दंड आकारण्यात आला आहे, अशी माहिती सहायक प्रादेशिक परिवहन अधिकारी सिद्धार्थ ठोके यांनी दिली.

वाहन तपासणीच्या ​या मोहिमेत सर्व वायुवेग पथके, तसेच जिल्ह्यातील 14 तालुका पथकांमधील मोटार वाहन निरीक्षक व सहायक मोटार वाहन निरीक्षकांनी सहभाग घेतला. या पथकांनी एकूण 2021 वाहनांची कसून तपासणी केली.

वाहन तपासणीदरम्यान 458 वाहनांवर बेकायदेशीर ब्लॅक फिल्म आढळल्या. त्यांच्यावर कारवाई करण्यात आली. आकारण्यात आलेल्या 6 लाख 46 हजार रुपये दंडापैकी 37 हजार रुपयांची वसुली करण्यात आली आहे. तसेच संबंधित वाहनांवरील ब्लॅक फिल्म्स काढून टाकण्यात आल्या आहेत.

​या विशेष मोहिमेत ब्लॅक फिल्म व्यतिरिक्त इतर बाबींचीही पडताळणी करण्यात आली. यात वैध विमा नसलेली वाहने, नोंदणी प्रमाणपत्र किंवा वाहन परवाना नसणे, वाहन चालवण्याचा परवाना नसणे, वाहनांतील दिव्यांमधील त्रुटी व वायू प्रदूषण नियंत्रण नियमांचे उल्लंघन करणाऱ्या वाहनांवरही दंडात्मक कारवाई करण्यात आली.
​
प्रशासनाचे आवाहन

“जिल्ह्यातील वाहन मालक व चालकांनी मोटार वाहन कायद्यातील तरतुदींनुसार वाहनांची समोरील (दर्शनी) काच व खिडक्यांच्या काचांवर ब्लॅक फिल्म बसवू नये. कायद्यातील अटी व शर्तींचे तसेच वाहतूक नियमांचे काटेकोर पालन करून प्रवाशांच्या सुरक्षिततेच्या दृष्टीने सहकार्य करावे,” असे आवाहन प्रादेशिक परिवहन अधिकारी विनोद सगरे यांनी केले आहे.