Nath Panth Dnyan Ganga : पुणे : “नाथपंथाची ज्ञानगंगा लाभणे हे परम भाग्य आहे. या ज्ञानगंगेच्या तीरापर्यंत येऊनही तिचा लाभ न घेणारे अभागी ठरतात,” असे प्रतिपादन नाथ संप्रदायाचे प्रवचनकार मिलिंद महाराज चवंडके यांनी केले.
सोमवार पेठेतील नरपतगिरी चौक येथील श्री संत गाडगे महाराज आश्रमात मंगळवार पेठेतील श्री देवेंद्रनाथ मठीच्या श्रावण संकल्प सांगता सोहळ्यानिमित्त आयोजित सत्संगात ते बोलत होते. पवित्र श्रावण महिन्यात महिनाभर सुरू असलेल्या जप, पारायण, अखंड धुनी, शोभायात्रा आणि सामूहिक यज्ञ सोहळ्याचा भक्तिमय वातावरणात समारोप झाला.
मठाधिपती प.पू. श्री. प्रेमेंद्रनाथ तथा प्रशांतभाऊ चिंचोलकर यांनी स्वागत व प्रास्ताविक केले. “श्री देवेंद्रनाथ मठीतर्फे श्रावण महिन्यात विविध धार्मिक उपक्रमांची परंपरा गेल्या २७ वर्षांपासून अखंड सुरू आहे,” अशी माहिती त्यांनी दिली. विद्या शिंदे यांनी सूत्रसंचालन केले.
व्दैताव्दैत पीठाधीश्वर प.पू. श्री. गहनेंद्रनाथ तथा जालिंदर बोखारे यांच्या दिव्य सान्निध्यात हा सोहळा पार पडला. नीतेश बांदल व प्रीती बांदल यांनी यजमानपद भूषविले. पौरोहित्य सौरभ पिसे, योगेश उंडाळे व चेतन माळी यांनी केले. यावेळी विरुपाक्षनाथ तथा तात्या सोनवणे, उमाकांत चिंचोलकर (वैराग), गजानन घोरपडे यांच्यासह विविध मठांचे मठाधिपती व नाथभक्त मोठ्या संख्येने उपस्थित होते.
